NAGKALAIN-lain ang reaksiyon niining pagsalmot sa Pilipinas sa International Basketball Federation (Fiba) World Cup human mapilde ang atong team sa makatulong higayon. Dili lang yanong pilde kon dili gilubong gyod og maayo sa mga team sa Italy ug Serbia. Matod pa sa uban nga nag-usik-usik lang kita sa atong panahon sa pag-ensayo og pundo nga mosalmot ning maong matang sa international competition.
Mao nga mohunong na lang ta og apil-apil ani kay wala gyud tay dag-anan. Maayo pag mag-focus na lang ta sa laing sports labi pa kon individual sports sama sa boxing nga adunay kahigayonan nga makampiyon ang Pinoy. Aduna say mo-ingon nga bahala na og pildihonon sa ubang kanasuran basta nakapakita usab kita sa atong abilidad nga mo-away gyud bisan dehado.
Kini gong duwa nga basketball, ang usa sa mga nakabentaha niini mao gyud ang height sa mga players. Kon walay height ang player, aw, maka-ingon gyud nga dili kaayo siya mosaler sa korte labi pa kon ang mga kontra tag-as kaayo sama sa mga Amerikano ug mga European.
Kon patas lang ang gitas-on sa mga players sama sa mga nasud sa Southeast Asia sama Japan, Korea, Malaysia, Thailand bisan China, aw, kombati pa ta. Gani makadaghan na nga higayon nga nakampiyon ang Pilipinas sa mga duwa sa Southeast Asian (SEA) Games. Pero sa world competition, di ta manimaho.
Sa mga duwa nga wala kinahanglana ang height sama sa baseball ug soccer football labi pa gyud sa nga individual events boxing, archery, shooting, bowling, aw, dili gyud ta pod magpalupig uy. Nganong naka-baton man kita og Manny Pacquiao sa boxing?
Magpabilin gani nga ingon niini ang atong height, wala kitay kahigayonan nga mokampiyon. Wala pod tay maayong mga players sa outside shooting. Mas pabor ko sa sugyot sa uban, nga dili na lang ta magpatuga-tuga og apil sa world competition.
Sa Asia siguro okey ra. Nagkinahanglan tag mga players nga molupad. Wala dihay manglupad sa Naga ug taga Siquijor? (bobbygnalzaro@gmail.com)