VILLABA, Leyte – Gisaka sa mga sakop sa Philippine Drug Enforcement Agency (PDEA) 8 ug Campaign Against Illegal Drugs (CAID) ang bukirang bahin sa Barangay Abijao ning lungsod, Lunes, Septiyembre 2, 2019.
Kini may labot sa nadiskubrehan nga marijuana plantation sa lugar human usa ka asset sa CAID ang nakakuha og sampol sa dahon nga gipaubos sa laboratory sa PDEA.
Apan way nakaplagang plantation kay wa ang guide. Upat ra ka punoan ang nakit-an.
Alas 11 pasado sa gabii, nibiya gikan sa kampo sa 93rd Infantry Battalion ang kapin 50 ka operatiba sa PDEA ug CAID uban sa Superbalita Cebu.
Pasado alas 12 sa kadlawon, Septiyembre 3, 2019 niabot sa highway sa Abijao ang mga operatiba ug nisaka sa bukirang bahin.
Gipangbilin sa highway ang lima ka sakyanan.
Human sa kapin tunga sa oras nga pagbaktas, nipahuway og kapin usa ka oras ang mga opertiba.
Gisuot sa mga operatiba ang batuon, apiki, libon ug ngiob kaayo nga lugar paingon sa plantasyon.
Matod sa usa ka opisyal sa CAID, naa sa 15 kilometros gikan sa highway makit-an ang plantasyon.
“Dili lang nato dayon matumbok kay ang asset nga nakaari wala man nato mauban kay naay medical problem ang nanay mao nga naglibot libot ta karon,” pasabot sa opisyal.
Alas 3 pasado sa kadlawon, nangatog ang mga operatiba sa lapukon ug sagbot nga bahin samtang dunay uban nagmata aron magbantay sa palibot.
Pag aksyon og hayag, nipadayon sa lakaw ang tanan.
“Ato lang gihuwat nga mo hayag kay aron makita nato kung duna bay mga barriers ug unsa pay angay nato bantayan,” pasabot sa taga CAID.
Sa pipila ka oras nga lakaw, nakabatyag ang uban og gutom ug uhaw busa nanghunong ug gidaginot ang nahabilin nga tubig ug biskwit.
Nianang buntag, hingpit nakit-an ang plantasyon diin upat ka gagmayng tanom ang narekober ug matod sa PDEA mobalor kini og P4,000.
Matod ni PDEA8 Assistant Regional Director Eduardo Makabenta IV, duna pay dakong posibilidad nga may plantasyon pa sa marijuana sa area ug ila kining gi-monitor.
Giimbistigar pa sa PDEA kon kinsa ang tag-iya sa yuta ug kinsa ang nagtanom sa marijuana.
Pasado alas 10 sa buntag, nakanaog gikan sa bukid ang mga operatiba. (JKDP)