GIHINGUSGAN sa kapulisan sa lungsod sa Dumanjug, Cebu ang pag monitor sa wa na ma-renew nga armas sa mga lumolupyo sa lungsod.
Matod ni PMaj. Ardioleto Cabagnot, hepe sa Dumanjug police, gipatuman sa tibuok lungsod ang Oplan Katok tipik sa gipatuman sa Philippine National Police (PNP).
Moabot sa 29 ka mga short firearms ang gipangtahan sa ilang buhatan gikan sa katapusan sa semana sa Agusto hangtod na ning semanaha.
Gawas sa 29 ka mga short firearms, anaa gipahipos una sa Dumanjug Police Station, duna pay laing 16 ka mga short firearms ang una nang na- surrender.
Mga tag-iya niini wa pa maka-renew sa Firearms Explosives Security Service Agency and Guards Supervisory section (Fessags) sa Central Visayas.
Dugang pa ni Cabagnot sa listahan nga ilang gihuptan gikan sa FESAGS, duna gihapoy mga naghupot og armas nga wa na ma-renew ang wa pa ma-surrender ngadto na kanila.
Matod ni Cabagnot, sukad nga gilusad ang Oplan Katok sa lungsod sa kabalayan lakip na sa mga opisyal sa lungsod ug mga kawani sa munisipyo, dunay mga armas nga ilang gipang-adtoan ug gipasabot sa tumong nganong ila kining gihingusgan.
Wa pili nga gipatuman ang programa bisan mga aktibong miyembro sa kapulisan ug mga sundawo, lakip na ang nangretiro nang kaparian, negusyante ug mga sibilyan gipangbisitahan.
Awhag usab ni Cabagnot sa mga wa pa nitahan sa ilang mga armas nga kon mahimo ma- surrender na ug di paabuton nga maaplayan pa sa korte og search warrant.
Ang mga pulis sa Dumanjug nga nitahan sa ilang personal firearms giabisohan nga kon duna silay igong oras, lihukon ang pag renew sa ilang mga armas.
Gipaniguro ni Cabagnot nga gitagoan nila ang mga armas nga gipang surrender sa mga nanag-iya ug ibalik ra kon duna nay maipakita nga papel nga ila nang na renew.
Si PSsgt. Romeo Legaspi Jr., usa sa mga boluntaryo nga ni-surrender sa iyang personal firearm ug nahinabi sa Superbalita Cebu, nibutyag nga usa sa mga rason nga wa ma renew ang iyang personal firearm mao ang kadaghan sa mga trabahuon sa opisina.
Nangita lang og lugar si Legaspi nga iyang magahinan og oras aron ma-renew ang iyang personal firearm.
Gitug-an ni Legaspi nga duna nay giisyu kanila nga mga armas nga iyang magamit samtang anaa pa gitagoan ang iyang personal firearm.