DIREKTOR sa Land Transportation Office (LTO) nibahad sa pagtaktak sa ilang mga deputized agent nga ireklamong nangilkil bisan pa kon di kini mamatud-an.

Matod ni Director Raul Aguilos nga hugot na niyang ipatuman ang one-strike policy nga nagpasabot nga palagputon dayon ang deputized agent nga ireklamong nangwarta gikan sa mga motorista.

Ang bahad ni Aguilos gihimo human sa pagkataktak sa 31ka nga enforcer sa Cebu City Traffic Operations Management (Citom) nga giingong nangilkil sa mga PUJ drayber.

"The Manny Pacquiao Blog". Click here for stories and updates on the Filipino boxing champ.

Matod ni Aguilos nga di siya gustong makadungog og reklamo nga dunay mga deputized agent nga nangwarta kay buot niyang limpyo ang dungog sa ilang ahensiya.

Nasayran nga karon lang Enero ning tuiga subling nidawat ang LTO og mga deputized agent human gi-recall ang deputation sa niaging tuig tungod sa daghang mga reklamo.

Tungod niini, matod ni Aguilos nga kadaghanan sa ilang mga deputized agents mga bag-o na ug wa na gidawat kadtong nalambigit sa kotong.

Gipaubos usab sa saktong training ang bag-ong mga deputized agents sa wa pa hingpit nga gidawat maong masaligon si Aguilos nga nasayod gyud kini nga di siya magpanuko sa pagtaktak kon malambigit sa pagpangotong.

Giklaro hinuon niya nga sa 31 ka mga Citom enforcer, unom lang kanila ang deputized agents ug nabawian na sa giisyong temporary operator’s permit (TOP).

Gipanghinaot sa LTO nga ang gidangatan sa 31 ka mga enforcers magsilbing leksyon ug pahimangno sa ubang mga deputized agents nga di gyud mangilkil sa mga motorista. (CPL)