USA ka senior citzen nga babaye ang namatay human nadasmagan og sakyanan diha Cebu South Coastal Road (SRP), Barangay Lawaan 1, siyudad sa Talisay.
Ang biktima giila nga si Zonzaida Lequigan, 63, taga Barnagay Linao, Talisay ang gideklarar na nga patay sa dihang gidala sa Talisay District Hospital.
Matud ni Jonathan Tumulak, pangulo sa City of Talisay Traffic Operations Development Authority (CT-TODA), nga Lequigan ang nilabang sa dan padung na unta mopauli sa ilaha sa dihang nadasmagan kini sa usa ka sports utility vehicle nga gimaniho sa usa ka Ruben Sumalinog, 51.
Tungod sa kakusog sa impact, nalagpot matud pa og pipila ka metros ang biktima. Nahitabo kini alas 6:30 Martes sa gabii, Septiyembre 3.
Si Sumalinog, trabahante sa usa ka cement factory ang giingong nagdali kay adunay giapas nga miting sa siyudad sa Sugbo, tali sa iyang agalong Japanese national.
Nitahan dayon ang drayber ngadto sa kapulisan. Hinuon, magkauyon ang duha ka habig nga i-settle ang kaso. (FMD)