NAKUHA na sa Cebu City Government ang P3.636 bilyones nga gideposito sa tulo ka higanting developer nga maoy nakapalit 26 gikan sa 46 ektaryas nga yuta sa South Road Properties (SRP) nga ilang napalit niadtong Agusto 2015.
Si Judge Estela Alma Singco sa Regional Trial Court Branch 12 nitugot nga makuha sa City Government ang maong kantidad isip ikaduha ug katapusang bayad sa Cebu Holdings Inc, Ayala Land Inc, SM Prime Holdings Inc nga ilang gi-consigned niadtong Agusto 2017 ug 2018.
Ang Filinvest Land Incorporated (FLI) kinsa maoy nakapalit sa 19 ektaryas nga luna didto sa SRP ug nibayad sa P2.8 bilyones niadtong sayong bahin sa Agusto apan wala gidawat sa Office of the Mayor ug gibalik ang tseke ngadto sa ilang buhatan.
“All hereby ordered released to defendant Cebu City Government through the Cebu City Treasurer’s Office the soonest possible..,” tipik sa desisyon ni Singco.
“Thereafter, once the consigned amounts are released, plaintiffs obligation in relation to the deed of sale on installment dated August 7 is considered discharged and extinguished. In view of the foregoing proceedings in this case are deemed closed and terminated,” ang hukom sa huwes niadtong Agusto 30.
Ang hukom sa RTC Branch 12, gihangop ni City Atty. Rey Gealon kinsa maoy nangulo sa pagsang-at sa motion to withdraw sa miaging semana para magamit ang maong kantidad.
“Dako kaayo kining kadaugan dili lang sa administrasyong Labella apan sa kinatibuk-ang katawhan nga Sugbuanon gumikan kay kini nagpasabot nga liquid ang Cebu City ug daghang mga programa ug proyekto nga mapatuman sa mayor ilabi na sa iyang gisaad panahon sa kampanya,” matod ni Gealon.
Lakip sa proyekto nga gipasabot ni Gealon mao ang paghuman sa Cebu City Medical Center, problema sa basura, baha ug kahuot sa trapiko ug uban batakang serbisyo.
Source of Fund
Giaprobahan na niadtong Martes, Septiyembre 3, ang P2.5 bilyones nga gipangayo ni Mayor Edgardo Labella ilawom sa supplemental budget no. 2 kansang tinubdan sa pundo mao ang halin sa 46 ektaryas nga yuta sa SRP.
Apan gipadayag ni Arlene Rentuza, kinsa maoy kasamtangang nga City Treasurer base sa Bureau of Local Government Finance (BLGF) nga dili ang bag-ong na-withdraw nga kwarta gikan sa korte apan ang tipik sa 50% nga down-payment sa ilang pagpalit sa yuta niadtong 2015.
Lakip sa gipundohan sa P2.5 bilyones mao ang P455 milyones para sa financial assistance sa senior citizens , P80 milyones para sa PWD’s , P250 milyones nga traffic light system, P 300 million para sa medical equipment sa CCMC, P100 million pra sa unang tulo ka andana sa CCMC ug laing P75 milyones para sa waste water.
Laing P627 milyones ilawom sa Office of the Mayor para sa pagpalit og yuta, P100 milyon para sa site development, P150 million sa pag-abli sa dalan ug P268 milyones para sa medium rise building para sa urban poor.
Atol sa regular session kagahapon, si Konsehal Nestor Archival kinsa maoy minority floor leader nipalabang og resolution pinaagi sa iyang privilege speech aron dili magamit ang halin sa 46 ektaryas gumikan kay adunay pending nga declaratory refief nga gisang-at si kanhi Mayor Tomas Osmeña.
Apan wala makalusot ang iyang resolution sanglit ni-object ang mayoriya pinagulohan ni Majority Floor Leader Raymond Garcia ug atol sa botohay, 10 ang nisupak, 7 ang niuyon ug ni-abstain si ABC President Franklyn Ong.
Si Labella sa iyang bahin nagkanayon nga wala nay babag sa paggamit sa halin sa maong yuta sanglit gihukman na kini sa RTC ug sa Court of Appeals nga legal ang pagbaligya sa maong yuta niadtong tuig 2015. (PAC)