IHATAG na sa Cebu City Government ang P3,000 nga tumbas sa tulo ka buwan nga hinabang pinansyal ngadto sa mga senior citizen ug persons with disability sa Dakbayan sa Sugbo karong Septiyembre 21 ug 22, Sabado ug Dominggo.
Kini ang gipahibawo ni Mayor Edgardo Labella human gi-aprobahan sa Cebu City Council ang P2.5 bilyones nga supplemental budget number 2 nga gipangayo sa Office of the Mayor diin apil niini ang P455 milyones alang sa senior citizens ug P80 milyones alang sa PWDs.
“Because of the approval of SB2, we will be distributing our financial assistance this coming September 21 kay ato pang i-reconcile ang tanan (pag-delete sa mga nangamatay). Daghan pag buhatonon and we will see to it nga wala gyuy ma miss kay there are senior citizens who already passed away,” padayag ni Labella.
Ang mayor nagkanayon nga ila unang hatagan og prayoridad ang 75,000 ka mga lolo ug lola.
Di una iapil ang bag-ong aplikante kinsa narehistro sa Cebu City niadtong 2011 hangtod 2013 subay sa amendatory ordinance sa pagpanghatag sa maong hinabang.
Subay sa listahan sa Office of Senior Citizens Affairs (Osca), kapin pa sa 1,000 ka mga senior citizens ang ni-apply aron maapil sa financial assistance sa Siyudad subay sa ordinansa.
“There will be verification that will be undertaken so that we will not commit a mistake and find out if this beneficiary is really entitled to the financial assistance based on the amendatory ordinance,” dugang ni Labella.
Si Dr. Jeffrey Ibones, pangulo sa Department of Social Welfare and Services (DSWS), nipadayag nga kon walay kausaban sa schedule, ang kapin o kulang 12,000 ka mga (PWD) makadawat sab sa ilang P3,000 nga financial assitance sama sa mga lolo ug lola karong Septiyembre 22.
Ang distribution sa financial assistance adto ipahigayon sa mga barangay hall o sports complex sa matag barangay diin gipahigayon kanhi ang pag-apud-apod sa mga ayuda.