USA sa mga kanhi sundalo nga gitutokan sa katawhan tungod sa iyang isug nga baroganan si Captain Nicanor Faeldon sa Philippine Marines.
Nagsugod siya isip usa ka aktibo sa serbisyo niadtong 1992 nga commissioned officer ug nahimong awardee sa Gold Cross Medal ug daghan pa nga pasidungog.
Naapil siya sa 321 ka mga sundalo nga miukupa sa Oakwood niadtong Hulyo 27, 2003 sa Makati City nga gipangunahan ni Capt. Gerardo Gambala, Milo Maestrecampo ug Lt. Antonio Trillanes IV diin ilang gibandilyo ang kurapsyon sa organisasyon sa kasundalohan ug pag-akusar nga ginabiligya sa mga opisyal ang mga pusil ug mga bala ngadto sa mga kalaban sa gobyerno.
Ang mga armas mao ra sab ang ginagamit sa mga kaaway pagpatay kanila diha sa giyera. Human sa 18 ka oras nga negosasyon, misurender ang mga sundalo nga ilang mga kauban dihang gipasaligan nga ang mga lider lang ang pasakaan og kaso apan gilingla sila kay gipriso ang tanan ug gi kasuhan.
Sa gipahigayon ang hearing, miangkon ang uban nga sala ang ilang gihimo o nag plead guilty gawas ni Faeldon. Human sa gipahigayon nga hearing sa kasong coup d-etat niadtong Disyembre 14, 2005, mieskapo si Faeldon uban ang 29 ka mga sundalo nga kauban.
Sa hilom, gisulod ni Faeldon ang mga kampo sa kasundalohan aron pagkumbensi sa uban pa nga mouban sa pakigbisog alang sa limpyo nga kagamhanan batok sa administrasyon ni President Gloria Macapagal-Arroyo.
Enero 27, 2006 nasikop si Faeldon ug pipila sa kauban didto sa Mandaluyong City ug gibilanggo didto sa Camp Aguinaldo hangtud Nobyembre 29, 2007.
Ubos sa administrasyon ni President Rodrigo Duterte, gitudlo siya niadtong Hunyo 30, 2016 nga mangulo sa Bureau of Customs aron santaon ang kurapsiyon sa maong buhatan.
Gihimo kini tungod sa saad ni President Digong nga iyang undangon ang kurapsyon sa buhatan sa gobyerno apan pakyas kay ubos sa iyang pagdumala sa maong ahensiya.
Misamot man hinoon ug migawas ang isyu sa Tara ang senimana nga pagbinahinay sa mga hiphip tungod sa mga ilegal nga transaksyon hinungdan gibalhin siya ni Digong nga puli kang Gen. Ronald “Bato” dela Rosa sa Bureau of Correction.
Laing isyu ang nalambigitan ni Faeldon nga bisan ang mga senador nagduda nga dunay minilyon nga kwarta ang nalambigit sa pagpagawas sa mga priso tungod kuno ilang gipatuman ang RA.10592, ang GCTA diin apil sa mga gibuhian ang mga drug lord ug mga personahe nga nakonbikto sa ngilngig nga mga krimen.
Apil unta si Calauan Laguna Mayor Antonio Sanchez nga gisentensiyahan og siyam ka termino sa reclusion perpetua sa kasong paglugos ug pagpatay kang Eileen Sarmenta ug Allan Gomez.
Daw milanay na sab ang pagsalig ni President Duterte sa integridad ni Faeldon ug wa nihimuot sa iyang mga binuhatan. Gani man si Senador Manny Pacquiao nagasugyot na nga mas maayo nga mo-leave of absence usa si Faeldon aron dili maduhig si President Digong sa iyang kapalpakan.
Sa atong yano nga pagsabot daw milanay na ang kanhi baruganan ug handom ni Faeldon nga makab-ot ang limpyo nga gòbyerno kay halos ang kadaghanan kanila natakdan na sa kagaw sa kurapsiyon.