PADAYON ang imbestigasyon sa Women and Children Protection Desk (WCPD) sa Davao City Police Office (DCPO) ang usa ka Norwegian national nga gidudahan nga nalambigit sa human trafficking.
Miyerkules sa buntag, Septiyembre 4, sa usa ka dakong hotel sa Sta. Ana Avenue, Davao City, gilayong mihimo og operasyon ang WCPD-DCPO sa ilang nadawat nga impormasyon labot sa giingong kaso sa human trafficking.
Giingon nga dunay kauban nga duha ka mga bata nga misulod sa hotel ang Norwegian national nga si alyas Scherner, 54-anyos.
Dihang giinterogar na sa WCPD ang nasampit nga langyaw, nasayran nga nag-edad og 8-anyos ug 10-anyos ang nasampit nga mga bata.
Sumala ni Police Captain Nolan Tagsip, bag-ong spokesperson sa DCPO, nga dili usa ka entrapment ang nahitabo sanglit ila lamang giimbitahan ang langyaw sa pagpaklaro sa maong impormasyon.
Migula sa inisyal nga imbestigasyon nga ang usa ka 8-anyos nga bata, giingong anak sa iyang asawa nga Pinay sa pagkadalaga, dayon ang 10-anyos, pag-umangkon sa Pinay.
Gisaysay sa langyaw nga wala sa Davao City atol sa operasyon ang Pinay kinsa miuli sa probinsiya aron maghikay sa mga dokumento sa 8-anyos nga bata.
Hinuon, gipasabot sa DCPO nga usa lamang kadto ka pagpaklaro sanglit nagpabilin ang kapulisan sa Davao City sa pagkaalerto labi na sa ingon niini nga insidente nga gikalambigitan sa kabataan.