TIKLO ang duha ka mga managsilingan nga giingong high-value target sa listahan sa nalambigit sa ilegal nga druga sa dakbayan sa Cagayan de Oro.
Gironda sa Philippine Drug Enforcement Agency (PDEA)-Northern Mindanao ang panimalay ni Pidao Macaondot Itomama alyas Jalilah Tanggo/Jalila Macapanton, 35, kinsa anaa sa ika numero 8 samtang gi-ronda usab ang balay ni Divina Sumagayan alyas Diding, 53, ug lumulupyo sa Sitio Carinogan, Carisna Riverside, Lower Balulang, dakbayan sa Cagayan de Oro.
Gibutyag ni Wilikons Villanueva, director sa PDEA-Northern Mindanao, nga high-value target ang mga suspetsado kinsa maoy mga tinubdan sa ginadiling druga sa Barangay Balulang.
“High-value target ito, si Pidao is top number 8, si Divina is number 9 sa Cagayan de Oro City sa drug target list, mao ni sila ang main source sa druga dinhi sa Balulang,” matud ni Villanueva.
Gidugang pa niini nga nagagikan sa dakbayan sa Marawi ang mga suplay niini nga ilegal nga druga ug dinhi sa dakbayan sa Cagayan de Oro gipamaligya.
Nakumpiska sa panimalay ni Itomama ang tulo ka dagkong pakete o sako sa shabu ug laing unom ka mga gagmay nga pakete lakip na diha gisulod sa sudlanan sa usa ka fastfood chain nga gibana-banang anaa sa P100mil ug mga 15 ka gramo.
Sa bahin ni Itomama, gipanghimakak niini ang alegasiyon ug wala kini nalambigit diha sa ilegal nga druga.
“Balay ni sa akong papa, dili ni akong balay, dili man gapamaligya akong papa kay naa man siyay sakit, dili ko gasuyop uy bisag kas-a, dili gyud nako na angkunon kay dili gyud na ako,” matud ni Itomama.
Samtang nakuha usab gikan kay Sumagayan ang tulo ka mga dagkong pakete sa gitoohang shabu ug laing lima ka mga gagmay nga pakete nga gitagoan sa ibabaw nga bahin sa panimalay.
Giangkon usab ni Sumagayan nga naggamit kini kaniadto apan ni-undang na. Nasayran nga duna kini P31,900 ug giingong iya kining pautang.
“Dili na ako, dili gyud ako, di man to akong pouch,” matud ni Sumagayan.
Mokabat ngadto sa mga anaa kapin kon kulang P170 mil ang nakumpiska atol sa maong pagpangronda.
Ang maong mga suspek ang gidala na sa buhatan sa PDEA kini human positibong nakuhaan sa mga ilegal nga druga.
Nagbahad usab ang tinugyanan sa PDEA nga duna pay mosunod ilabi na kung padayon pa gihapon kining maglambigit diha sa ilegal nga druga.