NITAHAN ang 50 anyos nga lalakeng kanhi inmate sa National Bilibid Prisons nga taga Dakbayan sa Bogo human mahibawo sa mando ni Presidente Rodrigo Duterte sa pagpatahan kanila.
Si Duterte, niadtong Miyerkules, Septiyembre 4, nimando sa 1,914 ka kanhi mga inmate nga nakapahimulos sa good conduct time allowance (GCTA) sa pagtahan sulod sa 15 ka adlaw.
Kon di sila motahan, isipon silang mga pinangita sa balaud, hayan patungan og P1 million matag ulo, madakpan, buhi o patay.
Nitahan mao si Jesus Ranoco Negro, Jr. 50, taga Barangay Dakit, Siyudad sa Bogo nga nabilanggo sa NBP, apan nabuhian tungod sa GCTA niadtong Agusto 9, 2018.
Siya ang ikaduhang binilanggo nga nisanong sa awhag sa Presidente nga mo-surrender bisan kon kapin na sa usa ka tuig na siya nga gawasnon.
Si Negro nabilanggo og 30 ka tuig tungod sa walo ka mga kasong murder ug usa ka frustrated murder. Marso 1990 gi-commit siya sa Bureau of Corrections (BuCor) sa NBP.
Apan una siya nga nabilanggo dinhi sa Sugbo niadtong 1988.
Gisentensyahan siya nga mabilanggo sa tibuok kinabuhi, apan tungod kay nagbinuotan ug nipakita og kaayo sa sulod sa bilangoan, ni-apply siya sa GCTA.
Gitug-an ni Police Lieutenant Colonel Emely Santos, hepe sa Bogo City Police Station, nga human nibuto ang kontrobersiya sa Bucor, wa sila masayod nga naa diay sa ilang siyudad ang usa sa mga binilanggo nga nakabenepisyo sa GCTA.
“Honestly wala mi kahibalo nga naa diay mi diri sa Bogo kay wala man mi listahan gikan sa Bucor. Nakurat nalang mi nga mianhi na siya diri gabii (September 4) nga mo surrender daw siya kay apil siya katong nabuhian gud,” matod ni Santos sa Superbalita Cebu.
Makig-alayon
Si Police Colonel Roderick Mariano, director sa Cebu Provincial Police Office, nagkanayon nga makig-alayon una sila sa BuCor.
Kon kinahanglan pa sila nga moimbestigar, ila kining buhaton apan mangayo pa silag advise gikan sa kadagkoan sa Bucor ug sa buhatan ni Duterte.