ANG Pole Vaulter nga si EJ Obiena maoy unang Pinoy nga nakahulbot og luna alang sa 2020 Tokyo Olympics.
Kini human nga iyang limpiyo nga nahipos ang 5.81 meters sa qualifying competition didto sa Chiara, Italy niadtong Martes nga igo na kaayong nakapasulod kaniya sa matag upat ka tuig nga panagtigi sa natad sa paugnat sa kusog.
Sa samang higayon, nakapataas usab kini sa iyang moral nga makaangkon sa iyang unang gold medal sa Southeast Asian Games sa New Clark City sa Capas, Tarlac sa uwahing bahin ning tuiga.
Ang maong kalampusan mibuak usab sa kanhi 5.76 meter record nga iya ra pud nga nakulit sa 30th Summer Universiade sa Naples sa niaging Hulyo.
Hinuon kini maoy ikatulong higayon nga naka-establisar si Obiena og record sa Pilipinas - ang una niadtong Abril sa 23rd Asian Athletics Championships sa Doha, Quatar diin mirehistro siya og 5.17. (JBM)