GIMANDOAN na sa World Boxing Organization (WBO) si bantamweight champion Zolani Tete nga depensaan ang iyang kampiyonato batok ni interim champion John Riel Casimero.
Gihatagan sa WBO ang kampo ni Tete og 90 ka adlaw human sa kadaugan ni Casimero niadtong Agusto 24 batok ni Cesar Ramirez kinsa iyang gi-knockout sa ikanapulo ka round sa San Andres Sports Complex sa Kaulohan.
Si Frank Warren, ang promoter ni Tete, mibutyag nga nagpadayon na karon ang negusasyon tali kaniya ug sa kampo ni Casimero, kanhi usab flyweight world champion.
Ang lumad nga taga dakbayan sa Ormoc ug kanhi nagbasehan sa Sugbo anaa na karon sa pagdumala sa MP Promotions ni Manny Pacquiao ug ubos sa paggiya ni Nonoy Neri.
Si Casimero adunay 28-4, 19KOs nga record. Nahimong interim champion sa dihang iyang gipaundang si Ricardo Espinoza.
Samtang si Tete, sa iyang bahin, naghupot og 28-3, 21KOs nga record. Gikatakda unta siyang makigsangka ni “Filipino Flash” Nonito Donaire alang sa WBSS semifinal bout apan ni-withdraw kini sa dihang nakaangkon og angol sa iyang abaga.
Mosaka ang taga South Africa sa ring nga dala ang bintaha sa gitas-on batok ni Casimero. Si Tete mobarog nga may 5-9 ang gitas-on kon itandi sa 5-4 nga Casimero. Apan ang taodtaod niyang pagpahuway posibling makapataya sa iyang kahanas. (JBM)