USA ka open-air nga kapilya ni San Agustin nagbarug na karon sa SEDC-St. Augustine EcoPilgrimage Park didto sa bukirang Barangay sa Magsico, San Fernando nga bukas na alang sa mga bisita ug mga kalihukan gikan sa alas 8:00 sa buntag ngadto sa alas 5:00 sa hapon.
Mibendisyon niini si Padre Murphy P. Sarsonas, kura pa sa Parokya sa San Agustin de Hippo sa maong bukirang bahin sa lungsod ug misaulog sa unang misa dinhi.
Pipila ka mga kalihukan ang napahigayon sukad sa maong ecopark, ilabina panahon sa Kwaresma, lakip na sa mga Via Crucis, Visita Iglesia ug Sugat, matod ni Mitzie Almira I. Carin sa Solid Earth Development Corp. (SEDC), tag-iya ug nagpadagan sa parke.
Nakapahigayon ang kabataaan sa parokya og usa ka team building, samtang nagpahigayon na ang parokya sukad Mayo 4 pa og First Saturday Mass ug mga 2,000 Hail Mary Prayer Devotion, siya midugang.
Giugmad sa SEDC ang parke sa pito ka ektarya nga kanhi giminahan niini uban sa pakig-alayon sa Archdiocese sa Sugbo nga miila sa parke nga modelong pocket forest nga giawhag ang matag parokya sa momugna sab.
Sa iyang pagpangulo sa Cebu Archdiocese Commission on Environmental Concerns (CACEC), gikampyon ni Sarsonas ang tinguha nga makabaton og mga pocket forest nga iyang sugdan sa bag-ong parokyang gidumala sa Pajac, Lapu-Lapu City.
Nitungha atol sa pag-inagura sa kapilya alang sa CACEC ug sa Archdiocese si Arch’t. Socorro Borromeo Atega nga magtatambag sa komitiba sukad pa sa pagmugna niini pag-2016 International Eucharistic Congress.
Mitambong sab sila si Atty. Dennis B. Tenefrancia, pangulo sa SEDC, ug senior technical adviser Hiroyuki Sakakibara uban nilang mga konsehal sa lungsod, Gemma Bacalla, Eutiquio Baricuatro, Erico Enad ug Teddy Luzano.
Mao sab si Kapitan Mario Sebial sa Magsico uban nilang konsehal Victor Paypa, Primo Paradero ug Roger Villamor, pipila ka parokyano ug nga sakop sa San Agustin de Hippo Environmental Stewards.
Gipadla sab sa Taiheiyo Cement Philippines, Inc. (TCPI) si Zenith Rubi, tadguma sa human resources and administration (HRA) division, uban sa community relations section head Vanessa Bongcawil ug community relations coordinator Ted Frances Servano.
Bukas ang SEDC-St. Augustine EcoPilgrimage Park sukad pagbendisyon niini sa Arsobispo sa Sugbo Jose S. Palma niadtong Marso 22, 2018.
Tigbisitahan na sab ang pipila ka mga turista ug mga relehiyosong magpapanaw sa ecopark harun mag-ampo ug mananom pa gani og kahoy, o maglingaw-lingaw ug makigdugtong sa kinaiyahan. (PR)