Sugilanon: Ang singsing ni Amadius

NAGPAABOT si Mariel kang Andoy, suod niyang higala. Gisugo niya si Andoy aron pagpangita kang Amadius, kay hangtod karong orasa wala pa kini moabot sa simbahan. Giabot si Mariel og kabalaka tungod kay maulawan siya ug ang iyang pamilya kon dili mahinayon ang ilang kasal ni Amadius niadtong buntaga. Nagpanglantawan niya nga daghan gyung mobiaybiay kaniyang mga higala kon dili moabot si Amadius aron ihatod siya sa altar sa kaminyuon.

Nakita ni Noy Berto ang iyang kamanghurang anak nga gisanapan sa tumang kabalaka samtang naglingkod sa sementadong hagdanan luyo sa simbahan nga nagpaabot sa iyang pamanhunon. Pinangga niya si Mariel tungod kay buotan ug masulundon sa iyang ginikanan. Apan nahigugma lamang sa usa ka kabos nga mag-uuma nga si Amadius. Kini wa ikalipay ni Noy Berto. Mao nga nakigsabot siya kang Don Israel, usa ka adunahang magpapatigayon sa ilang dapit. Gipatambog ni Don Israel si Amadius sa iyang mga tawo didto sa dakong lawod aron dili mahinayon ang pagpakasal niini kang Mariel. Ug wala nay makababag sa pagpakasal ni Mariel kang Anselmo, anak ni Don Israel. Si Anselmo maoy gusto ni Noy Berto nga mahimo niyang umagad, ilabi na kay nakautang si Noy Berto og dakong kabubut-on kang Don Israel. Gihatagan siya ni Don Israel og dakong bangka panagatan nga iyang gigamit sa inadlaw nilang kabuhian.

Giduol ni Noy Berto si Mariel.

“Mariel,” sangpit ni Noy Berto. “Kalimti na si Amadius! Dili na siya moabot pa! Si Anselmo kanunay nagpaabot kanimo.”

Apan midumili si Mariel. Dili katudloan ang iyang kasingkasing sa paghigugma kang Anselmo. “Pasayloa ko, Papa. Dili ko madawat si Anselmo. Si Amadius ang akong gihigugma.”

“Hungog ka!” singaak ni Noy Berto. “Praktikal na karong panahuna. Dili makaon ang gugma panahon sa kalisod. Timan-i kana!”

“Dako ang akong pagtuo nga moabot da si Amadius karong adlawa aron pagtuman sa iyang gisaad kanako, Papa!”

“Patay na si Anselmo. Ug dako ang akong pagtuo nga gitukob na siya sa mga iho!” ni Noy Berto.

“Unsay buot mong ipasabot, Papa? May kalabutan ka ba sa iyang wa pagtunga ni Amadius sa among kasal karon?” nahimalingka si Mariel.

Wala makatubag si Noy Berto. Hinunoa, kalit kining mibiya sa nahimutangan ni Mariel. Nahadlok siya nga masayran ni Mariel nga duna siyay gitago sa iyang anak.

Unya may nahinumduman si Mariel, ang singsing ni Amadius nga gihatag kaniya. Ang wedding ring sa ilang kasal.

“Timan-i kini, Mariel. Sa higayon nga di mo na ako makita, kining singsing nga bulawan alang sa atong kasal ibilin ko kanimo. Sa higayon nga kini mogilaw, dako akong buhi ug mobalik ako aron pagtuman sa atong kasal,” mga pulong ni Amadius.

Gikuha ni Mariel ang singsing gikan sa iyang sapaw ilawom sa iyang wedding gown. Migilaw ang singsing. Mao say pag-abot ni Andoy, ang suod niyang higala. May buot ibutyag kini kang Mariel.

“Andoy, nakita mo ba si Amadius?” sukot ni Mariel.

“Tan-awa kinsa kanang nagpaingon nganhi.” ni Andoy.

“Si Amadius kana, Andoy! Mahinayon gyud diay ang among kasal!” Dili masukod ang gibati ni Mariel nga kalipay ni Mariel.

“Nakita kong gitambog si Amadius sa armadong mga tawo didto sa lawod,” tug-an ni Andoy. Gisaysay niya giunsa pagluwas si Amadius sa usa ka dakong balyena kansang bukobuko maoy gisakyan ni Amadius. Ang bangka nga gisakyan sa mga tawo nga nagtambog kang Amadius sa lawod gitikwang sa balyena ug mga sakay niini gipangtukob sa mga iho.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph