NAGUOL ug naglagot sab mo sa gidangatan sa Gilas Pilipinas batok sa Italy, Serbia ug Angola? Mag-move on na ta uy! Wa na tay mahims.
Kon naguol ta, mas naguol sab tingali ang mga magdudula mismo. Pwerte god intawn nilang paningkamot pero... unsaon ta man? Didto ra gyud kutob ang ilang mahimo.
Duna pa man kunoy umaabot nga dula sa Beijing. Manghinaut lang ta nga pulos maayo ang panglawas sa mga magdudula.
•••
Malingaw kong maghunahuna aning uban nga magkarakara og patukar sa mga Christmas songs ug magsugod nag pangadorno alang sa Pasko.
Manghinaut lang ko nga ang inyong kasibot magpadayon hangtud sa adlaw sa Pasko mismo. Kon mokuyog ko ninyo, di ko kapasalig nga ingon pa ko ana ka excited inig abot sa Disyembre.
Mao nga unya na lang ko magkarakara. Kamo lang unà.
•••
Bisan wa pay gipahibalo nga petsa ug lugar alang sa Ms. Universe 2019, sigesige na ang ensayo ni Ms. U Philippines 2019 Gazini Ganados. Una niyang gitutukan ang public speaking ug ang Question & Answer.
Magsugod na karong buwana ang ensayo niya sa runway walk ug projection. Nag boxing, muay thai ug yoga si Gazini ug white meat ug utanaon ang gikaon alang sa iyang panglawas.
Wa kaayo niya hunahunaa ang paghimog back-to-back win kay basin kunog di siya katiwas. Basta nag-enjoy lang kuno siya. Best wishes!
•••
Hapit na sab diay ang pagsaulog sa Press Freedom Week pero sa di pa ni sugdan, magpili una og Mr. & Ms. Press Freedom Week 2019.
Kinsa kaha ang palarang modaug sa maong mga titulo? Gikan kaha sa mga media outlets nga sige nang kadaug sa una? O may pakugang ba kaha nga mahitabo?
•••
Uy! Basin malimot mo labina ang mga deboto sa Mahal nga Birhen Maria kang kansang adlawng natawhan pagahandumon ug saulogon karong Dominggo, Sept. 8.
Sa akong nahibaw-an, dunay ipahigayon nga Walk With Mary gikan sa Fuente Osmena circle hangtud sa Plaza Independencia nga magsugod sa alas 4 sa kaadlawon.
Gawas sa kandila ug rosaryohan, pagdala sab og payong kon simbako mobunok ang ulan. Labing maayo magdala usab og reserba nga T-shirt. Kon di mabasa sa ulan (basin ba diay), mabasa sa singot sa paglinakaw.
Ma-carry ra? Go! Join!