NAGPLANO ka ba nga mopalayo sa siyudad? O gusto ka ba nga ma-detox sa stress ug kakapoy sa city life?
Pwes, ayaw liboga ang imong huna-huna sa pagpangita og dapit nga kasuroyan kay diay perfect place nga maghatag og katagbawan sa imong pag-detoxify nga layo sa polusyo, kasaba sa palibot, kahuot sa trapiko ug ubang kasamok.
Akong ipa ila-ila ang dapit sa Sulfatara.
Kung mga ma-anindot nga kala-agan ang atong hisgutan, di sab gyud palupig ang dakbayan sa Ormoc, lalawigan sa Leyte.
Usa sa mga barangay sa maong dakbayan mao ang Barangay Cabintan, nga gidagsa na sab karon sa mga lokal ug langyaw nga turista.
Nahimutang ang maong barangay duol sa Alto Peak, ang gi-isip nga highest point sa Samar-Leyte.
Nabulahan di lang sa mga ma-anindot nga kabukiran ang maong barangay apan lakip na sa ma-anindot nga Lake Janagdan, duha ka mga waterfalls: Mag-aso ug Tres Aguas, hot spring ug Sulfatara peak, wa pay labot niini ang mga nagkadaiyang kasapa-an.
Sa pagbisita sa Superbalita Cebu sa dapit, wa gyud palabya niini ang higayon nga mabisita ang Sulfatara nga nahimutang duol sa Alto Peak.
Bisan pa man sa dautan nga panahon, nasaka namo ang gabonon (foggy) nga Sulfatara sud lang sa usa ka oras sanglit aduna man sab mi gidala nga sakyanan.
Dali ra maabot ang maong dapit ilabi na kung aduna moy pribadong sakyanan nga makasaka paingon duol sa area sa dili pa magsugod og baktas sa Sulfatara peak.
Ginganlan ang dapit sa mga residente og Sulfatara tungod kay aduna may daghang sulfur-deposits, gani imo kini matimahoan ang maong klase sa mineral sa pag-abot nimo sa kinatumyan.
Kon maayo ang panahon, inyong makita ang Cabintan proper ibabaw sa maong bukid ug sa laing habig sa dapit ang Jaro, Leyte.
Exotic plants
Namungingi sab sa nagkadaiyang flora ug fauna ang dapit diin makakita kamo og wild strawberry nga gitawag sa mga taga didto og “baknit”, mga wild flowers ilabi na nagkadaiyang klase sa nabantog nga “pitcher plants” (scientific name “Nepenthes.”).
Pahimangno sa autoridad nga gidili ang pagpanghilabot ug pagpangibot sa mga exotic nga tanom tungod kay aduna kini dakong silot nga gipahamtang sa Department of Environment and Natural Resources (DENR).
Kon nature adventure inyong gipangita, ayaw gyud sipyata sa pagbisita ang Cabintan ug kon ganahan mo og panoramic view sa kabukiran, ayaw ninyo palabya ang pagsaka sa Sulfatara.
Baratong utanon
Major products sa Barangay Cabintan ang mga utanon sama sa repolyo, Chinese cabbage, pechay, beans ug uban pang klase sa mga utanon maong kon mobisita mo didto, pamalit mo’g mga utanon tungod kay paniguradong di lang presko apan barato ang presyo.
Unsaon pag-adto?
Alang niadtong mga way kaugalingong sakyanan, pwede mo mosakay og jeep paingon sa Brgy. Cabintan gikan sa Ormoc City. Ang plete anaa sa P40 ngadto sa P50.
Mas maayo nga sayo sa buntag mo og hike sa Sulfatara nga anaa sa lima ka kilometros gikan sa Sitio Marang sa barangay.
Sa mga nagplano nga mobisita sa Sulftara, mas maayo nga mokontak mong daan sa Cabintan Tourism Office o magkuha og guide gikan sa community - based tour guiding services nga CaLEguid (Cabintan Local Eco Guide) pinaagi sa numero 09217243042.
Pahinumdum
Sa mga buot mo-hike didto, gipahimangnoan nga mga hikers nga mag-amping ug di magkiat sa pagkuha og selfie o mga hulagway aron malikayan ang disgrasya nga mosangpot sa pagkatagak sa pangpang.
Gi-awhag sab ang mga moadto nga di magpataka og labay sa ilang mga basura.