NGANONG nagpadayon man ang sabong sa mga buwangan dinhi sa Sugbo gawas sa Mandaue City? Atong nasayran nga wala magpadayon sa pagsultada ang Mandaue Coliseum tungod kay buot nilang tun-an pag-usab ang ordinansa nga gipasar sa Mandaue City council nga nagtugot sa mayor nga, gawas sa Domingo ug sa mga holiday, mahimo silang makabuwang sa Lunes, Martes ug Miyerkules.
Apan ang hapit tanang mga buwangan sa Sugbo nagpadayon man sa pagsultada hapit matag adlaw. Di ba gironda man sa Criminal Investigation and Detection Group (CIDG) Mandaue ang Mandaue Coliseum kay nakasupak kini sa Presidential Decree (PD) 449 kon Cockfighting Law of 1974? Bisan ang maong decree wala magdili sa mga tawo nga mamusta sa buwang. Anaa pa gayuy bag-ong PD 1802 nga gihimo niadtong 1981 nga nagtukod sa Philippine Gamefowl Commission nga maoy gitahasan sa pagbuot sa tanang aspeto sa buwang. Apan sa mao gihapong adlaw gi-amendar ang usa ka section sa 1802 nga mao ang PD 1802-A. Kini ang naghatag og otoridad sa mga mayor, pinaagi sa pag-aprobar sa ilang Sangguniang Panglungsod/Bayan, sa paglisensiya ug pag-regulate sa mga buwangan sa ilang dapit.
Nganong wa na man manakop ang CIDG sa mga buwangan nga abli na hapit kada adlaw? Naka-amgo ba ang mga tinugyanan sa balaud nga nasayup sila sa pagronda ug pagdakop sa mga namusta sa buwang? Kon nagtuo ang CIDG nga husto sila sa ilang interpretasyon sa balaud sa cockfighting, kinahanglang ilang ipadayon ang pagpanakop sa mga buwangan nga molapas sa PD 449 kay kon dili tingali og anaay mopasaka og danyos sa pagdakop ug pagtanggong kanila sa dugay nga panahon kon wa diay kini basihanan.
•••
Murag mahatag na sa dili madugay ang financial assistance alang sa mga senior citizens ug persons with disabilities (PWDs) tungod kay napasar na ang supplemental budget alang niini. Atong nasayran nga ang pundo alang sa mga senior citizens ug PWDs hangtud lang niadtong Hunyo. Mao nga dili mahatag ang financial assistance kon walay supplemental budget alang niini. Wala pa madawat sa mga hingtungdan ang ilang financial assistance alang sa mga buwan sa Hulyo, Agusto ug sa Septiyembre. Nanghinaut ang mga seniors ug PWDs nga unta ihatag og tingbon ang tulo ka buwan nilang dawatunon.(Karong Septiyembre 21-22 ihatag sa Siyudad.)
•••
Angayang mapasar kining ordinansahon ni Cebu City Councilor Alvin Dizon nga maghatag sa mga sobrang pagkaon ngadto sa charitable institutions. Ang mga sobrang pagkaon sa restaurants, fast food chain, supermarkets ug grocery stores kinahanglang ihatag ngadto sa charity o aron ma-recycle. Apan aron masiguro nga limpiyo ug angayan pa kining kan-on anaay himuong certification ang mga health inspectors.
Gikinahanglan kini tungod kay anaay daghang mga pagkaon nga sobra sa mga restaurants ug ubang mga tindahan nga ipanglabay lamang. Kadaghanan niini mapunta sa mga kanal nga maoy makahugaw ug makabara niini inay nga kapahimuslan pa kini sa mga kabus. Anaay silut ang molapas niini.Hinaut pang madali og pasar kining maong ordinansahon.
(mannyrabacal1144@gmail.com)