GIPALAGPOT sa katungdanan ni Presidente Rodrigo Duterte niadtong Miyerkoles si Bureau of Corrections (BuCor) chief Nicanor Faeldon tungod kay wa siya motuman sa mando sa pangulo nga di buhian ang mga konbiktado sa mga linuog nga krimen.
Gimandoan usab sa pangulo ang dul-an sa 2,000 ka mga konbiktado sa mga heinous crimes nga gipamuhian na, lakip sa nagpatay ug naglugos sa managsuong Marijoy ug Jacqueline Chiong sa syudad sa Sugbo, sa pagtahan sa ilang kaugalingon.
Kon di sila mo-surrender sa BuCor sud sa 15 ka adlaw aron usbon pag-compute ang ilang sentensiya, ilhon sila nga mga fugitives, mga kriminal nga pinangita sa balaod. Matod pas taga Cabadiangan, kon dunay hatag-bawi, dunay buhi-sikop.
•••
Matod pa sa pangulo, gimandoan niya si Faeldon sa di pagbuhi sa mga konbiktado nunot sa kaguliyang nga mitumaw sa pagsuway pagbuhi kang kanhi mayor Antonio Sanchez sa Calauan, Laguna, konbiktado sa mga kasong murder ug pagpanglugos.
Si Sanchez gisilotan sa siyam ka reclusion perpetua nga tag 40 ka tuig. Pito sa paglugos ug pagpatay ni Eileen Sarmienta, estudyante sa University of the Philippines Los Banos ug pagpatay sa iyang higala, si Allan Gomez, ug duha sa laing double murder case.
Imbis motuman sa mando sa presidente, si Faeldon nanalipod na hinuon sa iyang gibuhat. Kon pangulo na gani ang momando, kinahanglan kining tumanon, matod pa sa Presidente.
•••
Usa sa iyang ipa-imbestigar sa Office of the Ombudsman, matod sa pangulo, mao ang pangurakot sud sa BuCor. Gibutyag ni Senate President Vicente Sotto nga ang mga konbiktado nga anaa sa New Bilibid Prison makagawas kon mobayad og minilyon ka pesos.
Mao kini ang ilang gitawag nga freedom for sale. Kinsa man kaha ang nahilambigit niining laing pamaagi sa pangurakotsud sa Bilibid? Sa una, ang Bilibid nisikat tungod kay mao kini ang tinubdan sa illegal nga drugas.
Samtang si Faeldon mao pa ang Customs Commissioner, nakalusot ang balor og P6 bilyones nga shabu. Sa dihang nahimo siyang BuCor chief, nakagawas ang dul-an sa 2,000 ka mga konbiktado sa heinous crimes. Pastilan.