GRABE ang kasuko sa publiko human mahibaw-i nga mogawasay na si kanhi Calauan mayor Antonio Sanchez, kinsa gikombikto sa paglugos-pagpatay sa college student nga si Eileen Sarmenta ug pagpatay sa iyang uyab nga si kang Alan Gomez.
Apan mas nakugang ang mga Sugboanon kay ang tulo sa pito nga kombiktado sa pagpatay sa magsuong Chiong nakagawas na diay tunga-tunga sa Agosto 2019. Ang tulo tipik lang sa 1,900 kapin ka mga piniriso nga gibuhian base sa good conduct time allowance. Daghan kanila nakahimo og linuog nga mga krimen.
Kon wa pa mabuko ang pagbuhi unta kang Sanchez, kadaghan na diay unta sa nakabuhi nga mga piniriso tungod lang sa GCTA. Ang publiko nagmata lang og buntag.
Giingon nga dunay panagsumpaki sa balaud sa GCTA law ug sa implementing rules and regulation (IRR) nga pulos napasar ug gihimo panahon ni kanhi Presidente Benigno Aquino III.
Mabasol ba si resigned Bureau of Corrections (BuCor) chief Nicanor Faeldon nianing tanan nga nagbase lang sa balaud ug IRR? O ang miaging administrasyong Aquino nga maoy nag-umol sa balaud ug IRR? Di na panahon karon sa pagbasulay kay nakagawas na baya ang 1,900 ka mga gikombikto sa National Bilibid Prisons (NBP). Ang labing maayo karong buhaton mao ang pagpaninguha nga mahibalik ang mao nga mga tawo sulod sa bilanggoan.
Kinahanglan nga i-review ang balaud ug kon gikinahanglan, amendahan ang IRR ug balaud aron matul-id ang mga kasaypanan sa ingon, matul-id ang balaud, di magamit sa kurakot nga mga opisyal. Gikataho ra ba nga gikinahanglan nga dunay padangog aron makapahimus sa GCTA.
Ang nahitabo karon susama ra sa usa ka balay nga nagdilaab na. Lalisan pa unsaon sa pagpawong sa kayo, kinsay nakaingon sa sunog ug unsay sinugdanan sa kayo.
Gikinahanglan nga ibalik ang mga piniriso ug tan-awon pag-ayo ang mga buslot sa balaud.