DUGANG 174 ka mga illegal drug-dependent kaniadto ang nitapos na sa ilang unom ka buwan nga rehabilitasyon ug aftercare nga programa sa kagamhanan sa Siyudad sa Talisay.
Sila ang nidugang sa dul-an an 1,000 sukad mas gipalambo pa ang Talisay City Outpatient Rehabilitation and Aftercare program sa Kagamhanan sa Siyudad sa Talisay sugod sa 2016.
Gitug-an ni Dr. Rey Cesar Bautista, nangulo sa programa, nga 2012 pa sila gasugod sa Siyudad, apan mas gipalambo atol sa pagsugod sa war on drugs ni Presidente Rodrigo Duterte.
Sa 174, 44 niini ang barangay-based kun kadtong bag-o lang nagsugod sa paggamit sa drugas, 130 niini mao ang facility-based kun kadtong moderate ngadto sa grabe na ang problema sa paggamit sa drugas.
Usa na niini ang 47 anyos nga nagpaila nga si Junjun, kinsa nitug-an nga sulod sa 10 ka tuig siya nga naggamitan og shabu.
Gani, nasikop siya sa Barangay San Roque niadtong 2016.
Usa siya na sa naka-avail sa plea bargaining agreement hinungdan nga nakaangkon sa iyang kagawasan.
“Wala gyud kaayo nga mahatag ang drugas. Pasalamat na ko karon human sa usa ka tuig gyud ko nipaubos sa programa, nabalik na ang pagsalig sa akong pamilya. Mao gyud na pinaka-importante, kay nawala na ilang pagsalig ug gugma sa ako sa dihang grabe ko nagumon sa drugas,” angkon ni Junjun.
Gitug-an ni Bautista nga ang ilang gihatag nga program, kon alang sa pribado pa nga pasilidad, mobalor og P70,000 matag usa.
Apan libre tanan kini nga gihatag sa kagamhanan.
Apil na niini nga sa unom ka buwan nga pagpaubos sa rehab, kaduha kada semana himuon ang drug test.
Human sa ilang completion program, tabangan usab sila sa City Social Welfare Services alang sa ihatag nga libre nga pagpatungha og balik, pinaagi sa advance learning system, o libreng kolehiyo sa Talisay City College.
Anaa pa ang livelihood program alang kanila ug sa ilang pamilya.
Nagpangidaron og 18 anyos ang labing bata ug 65 anyos ang labing guwang sa nalakip sa completion ceremony, Huwebes sa buntag, Septiyembre 5.
Si Mayor Gerald Anthony Gullas uban ang mga department head nitambong sa completion ceremony nga gihimo sulod sa Talisay City hall.
Gitug-an sa mayor nga usa kini sa iyang gihatagan og gibug-aton nga programa sa iyang administrasyon, isip pagtabang sa programa sa kapulisan batok drugas.
Ang Talisay usa sa mga dapit sa Metro Cebu nga dunay dakong suliran sa illegal drugs.
Ang Barangay Tanke maoy dunay labing dakong suliran sa illegal drugs sa mao nga siyudad. Nahimo kining tinubdan sa illegal drugs.