NAKAKITA og kalapasan ang Department of Labor and Employment (Dole) sa GMA Network, diin may tulo ka kalapasan sa safety precautions sa lugar sa trabaho asa naaksidente ang namatay nga aktor, Eddie Garcia.
Sa report, gisulti ni Dole National Capital Region (Dole-NCR) director Sarah Buena Mirasol nga ang tulo ka safety precautions nga gilapas sa Kapuso network: wala pagsumite sa network og mga contractor sa report sa insidente sud sa 24 oras, wala pagbutang og safety officer, ug wa pagtagana og first aide professional sa set sa teleserye.
Labot sa resulta, may tigum nga himuon ang Dole, GMA-7, ug uban pang nalambigit sa insidente sa September 16, Lunes, diin mopaguwa og resolusyon ang maong ahensiya sa gobyerno.