DAGHAN ang nangutana, paunsa nakatabang ang Small Town Lottery (STL) nga gidala sa Philippine Charity Sweepstakes Office (PCSO) ngadto sa katawhan?
Nasayran nga ang PCSO abli kanunay sa mga requests labi na sa mga tambal, serbisyo sa pagpahatud sa pasyente ug posibleng moabaga sa mga galastuhon sud sa ospital ug uban pang mga charity services.
Di pa lamang dugay, ang PCSO mibalik na sa operasyon sa STL human kini gipasirad-an ni Pangulong Rodrigo Duterte, mihimo og pamaagi ang PCSO aron madugangan ang pundo niini pinaagi sa ubang pakulo.
Sa laing paagi, natukod kini gumikan sa mandu sa gobyerno ubos sa administrasyon ni Pangulong Duterte aron makubsan ang giingong matang sa mga illegal gambling.
Dihang nakita ang paglambo sa STL sa mga probinsya, gidugangan ang mga outlets niini aron sa ingon madugangan sab ang kita sa PCSO.
Giingong namugna ang pasangil gumikan sa kaugalingong interes sa pipila ka tawo nga naligsan ang ilang mga ilegal nga sugal.
Ang STL sa kabanikanhan usa ka dakong tabang gumikan dako kini og kontribusyon sa mga charity services nga hangtud sa karon ilang gipaningkamutan nga mapalapdan pa, suma sa PCSO.
Kudos sa kapulisan sa ilang gipakusgan nga kampanya sa pagbatok sa ilegal nga sugal sa Davao Region; kapulisan nga way hunong sa pagpanakop sa ilegal nga mga “ushers” ug mga “coordinators”.
Lisod man gud ning sakit sa pipila ka Pinoy, kay mainggit dayon, ug mohimo dayon og pagpangdaut labi na’g makita nga milambo ang usa ka patigayon.
Sa pagbalik sa STL, unta suportahan nato ang STL kay dako kini og mahatag nga tabang diha sa bagang hut-ong sa pobre.