COTABATO CITY -- Wa man tuod malit-ag sa sunod-sunod nga operasyon sa awtoridad, apan dakpan gihapon ang usa ka kumander sa Bangsamoro Islamic Freedom Fighters (BIFF) sud sa balay tambalanan.
Kini human masubay nga nagpatambal si Samad Masgal alyas Kumander Madrox, 43, minyo, ubos ni Shiek Esmail Abdulmalik alyas Kumander Abu Toraife tungod sa naangkon nga samad sa nahitabong operasyon sa mga awtoridad.
Nadakpan si Masgal alas 7:40 sa gabii, Miyerkules sud mismo sa Cotabato Regional and Medical Center (CRMC) sa dakbayan sa Cotabato.
Kini mismo ang gikompirma sa Philippine Drug Enforcement Agency -Bangsamoro Autonomous Region in Muslim Mindanao (PDEA-BARMM), uban ang puwersa sa militar ug kapulisan.
Nasayran nga samdan si Masgal sa wala niyang bukton ug giingong giputol sa mga doktor.
Kahinumdoman nga niadtong Agosto 14, 2016, gironda ang balay ni Masgal sa hilit nga dapit sa Midsayap, apan misukol kini ug nakaipsot samtang dunay naangol ug nakalas sa bahin sa raiding team sa mga awtoridad.
Narekober sa militar ug kapulisan sulod sa gitagoan ni Masgal ang tunga sa milyon ka pesos nga kantidad sa shabu, mga armas, bala ug bomba.
Sumala pa nga nakadawat ang PDEA-BARMM og impormasyon gikan sa molupyo sa Midsayap hinungdan nga milihok gilayon sila ug gisikop ang suspek sa pakig-alayon sa mga sundalo ug pulis.
Nag-atubang si Masgal og kasong murder, multiple murder, extortion, robbery ug drug trafficking sa North Cotabato ug Maguindanao.
Nagpasalamat sab si Azurin sa tabang ni Cotabato City Mayor Cynthia Guiani-Sayadi ug 6th ID Chief, Major General Diosdado Carreon sa pagkadakop kang Masgal. (Edgar E. Fuerzas)