NASANAPAN sa tumang kahadlok karon ang mga giingong ahente (agents) ug mga indibiduwal nga may kalabutan sa investment schemes sa Tagum City human sa sunod-sunod nga pagpamatay sa siyudad.
Kini tungod kay mga suspek sa pagpatay, manaka na gyud og balay sa target ug patyon.
Sagad sa mga biktima giingong dunay kalabutan sa napalpak nga money investment schemes o di ba kaha mga kabanay nila ang bughaon.
Labing uwahi nga biktima mao ang 21-anyos nga si Judy Lou Palas, human siya gisud mismo sa mga mamumuo sa ilang panimalay sa Purok Dahlia, Barangay Visayan Village, Tagum City, Miyerkules, Septiyembre 3, dayon gitusak-tusak sa bala.
Suma sa taho nga nanuktok pa ang mga suspek, ug dihang giablihan ang pultahan, gipusil gilayon ang biktima.
Sa maong higayon, nadamay pa ang manghud sa biktima apan maayo na lang kay luwas na kini.
Nasayran nga ang inahan ni Palas giingong agent ug cashier sa PLC Investment, usa ka money investment scheme nga nakabase sa Tagum.
Ang kamatayon ni Palas, halos semana lang ang gintang sa unang magtiayon nga sila Gilbert ug Analiza Payan sa Esmeralda Subdivision, Barangay Apokon sa siyudad nga gisulod sab sa ilang balay ug gipamusil.
Si Analiza nakalingkawas sa kamatayon samtang si Gilbert namatay ug giingong coordinator sa Gambaru, usa sab ka money investment scheme.
Gikondena
Sa sunod-sunod nga pagpamatay sa siyudad, ang lokal nga gobyerno sa Tagum nagkondena sa hitabo ug gitawag kining “barbaric.”
“The act of violence that targeted the hapless individuals in Tagum City is barbaric, yet smacked of cowardice in view of the perpetrators’ perceived cloak of anonymity,” pamahayag sa Tagum LGU.
Gihagit sab niini ang Tagum City Police nga gukdon ang mga nagpaluyo sa krimen ug patubagon sa gihimong salaod.
“The Tagum PNP is also directed to do everything within the legal boundaries afforded them by law to ensure that peace, security and safety is a personal reality for all Tagumenyos and Tagum City’s visitors.”
Nanawagan sab ang kagamahanan sa publiko nga pabiling igmat sa palibot, makig-koordinar sa awtoridad kung may impormasyon nga nakuha labot sa mga krimeng nagapanghitabo.
Ganti
Sa pikas bahin, kinsa mang makahatag og impormasyon sa mga suspek sa pagpamatay sa Tagum, mamahimong moreport suma pa kang Tagum City Mayor Allan Rellon sa numerong 09176248024.
Suma pa, may ganti nga ihatag sa impormante nga makatabang aron masignit ang mga suspek sa pagpamatay sa dakbayan. (Rhona Goc-ong-Villariasa)