14 ka barangay sa Valencia City drug cleared na

MOABOT na ngadto sa 14 ka mga barangay ang drug cleared sa Valencia City, Bukidnon tungod sa nagpadayon nga pag-implementar sa anti-drug campaign sa siyudad.

Gibutyag ni Police Lieutenant Colonel Surki Sereñas, hepe sa Valencia City Police Station, nga dili deretso madeklara ang usa ka barangay nga drug cleared kung walay igong beripikasyon, monitoring ug pagsusi gikan sa Philippine Drug Enforcement Agency lakip sa kapolisan ug lokal nga kagamhanan.

Kung ang barangay nagpatuman ug nagpadayon sa community-based rehabilitation and treatment program sa mga barangay nga nasustiner, lakip maayo ang kooperasyon sa mga drug suspek dako kini nga matang mapalambo ang barangay ug mahimong drug free.

Basihan aron mahimong drug cleared ang usa ka barangay kinahanglan nga wala nay suplay sa druga o gipangtagoan niini, aktibong partisipasyon sa mga opisyal sa barangay sa mga anti-drug activities, adunay matag karon ug unya nga drug awareness, mga education campaign ug inpormasyon ug dakong pag-ubos sa pushers ug users.

Ang Valencia City adunay 31 ka mga barangay ug 14 niini ang drug cleared diin sa bulan lamang sa Agusto gidugang ang barangay Barangay Barobo, Dagatkidavao, Nabag-o, San Isidro, Sinabuagan, Vintar, ug Maapag.

Matud ni Sereñas nga tungod sa daghang ihap sa drug cleared nga barangay hinungdan nga miubos og halos 40 porsiyento ang kriminalidad sa Valencia City sugod sa bulan sa Hunyo ngadto Agusto. Aduna lamang tulo ka barangay nga ilang gi-identify nga sagad gakahitabo ang krimen ug mao kini ang ilang gitutokan.

Dugang ni Sereñas nga nakadayeg sab siya sa lokal nga kagamhanan sa Valencia City tungod kay nagpadayon ilang gihimong community-based rehabilitation and treatment program ug nasustiner kini hangtod karon panahona.

Sa iyang bahin ni Giovanni Asis, acting City Anti-Drug Abuse Council (Cadac) coordinator, niingon nga padayon ang implementasyon sa treatment ug rehabilitasyon karon panahona sa mga barangay.

Dugang niini nga ang mga migradwar sa programa gipaubos gihapon og programa pagtabang kanila nga dili na mahibalik sa ginadili nga druga ug magpuyo nga adunay pangandoy sa kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph