IPAHIGAYON na karong alas 8:30 sa gabii ang labing gikaintapang kombati sa 2019 FIBA Basketball World Cup diin makigparang si Giannis Antetokounmpo ug ang Greece national squad batok sa defending champion Team USA sa 2nd round sa group stage sa Shenzhen Bay Sports Center sa China.
Si Antetokounmpo, kinsa maoy kasamtangang MVP sa National Basketball Association (NBA) ubos sa kampo sa Milwaukee Bucks, nanumpa nang daan nga buhaton niya ang tanan aron agakon ang Greece sa kampiyunato ning maong prestihiyusong torneyo.
Ang Team USA ningpatigbabaw sa ilang Group E sa 1st round nga wala’y pilde sulod sa tulo ka mga duwa.
Sa katapusan nilang tahas niadtong Huwebes sa gabii, wala’y kaluoyng gipanglubong nga buhi ang Japan, 98-45.
Nahimo kini sa Team USA human hapit sila napilde sa Turkey.
Sa ilang bahin, ang Greece ningmakmak sa New Zealand, 103-97, niadto sab Huwebes aron angkunon ang ikaduhang luna sa Group F dala ang 2-1 nga rekord. Ang Greece wala damhang napilde sa Brazil, 79-78, sa 1st round.
Sa 2nd round, nga gibahin sa upat na lang ka mga grupo, ang Team USA ug Greece nagkaabot sa Group K diin kauban nila ang Brazil ug Czech Republic.
Ang rekord sa 1st round sa tanang nakaabante nga teams ilahang madala sa 2nd round nga mosubay na sab og laing single-round robin.
Human niini, ang mopatigbabaw nga duha sa matag grupo mao ang makasaka sa quarter-finals knockout stage.
Sa ilang duwa batok sa New Zealand, si Antetokounmpo maoy napiling TCL Player of the Game human niya napagawas ang labing maayo niyang duwa sa kompetisyon diin nakamugna siya og 24 puntos, 10 rebounds ug unom ka assists.
Gikinahanglang ipagawas na kanunay ang labing maayo ning duwa gikan karon alang sa iyang tinguha nga ituboy ang Greece sa kampiyunato.
“It was a tough game for us because we lost the previous against Brazil. We had to win. New Zealand are a dangerous team as you could see. We had to stay focused for forty minutes, we fought a lot and we managed to control the rebounds,” asoy ni Greece head coach Thanasis Skourtopoulos nga napatik sa FIBA website.
Batok sa Team USA, ang Greece gilaumang makasugat og laing malisod nga pagsuway.
Wala man tuod ang NBA superstars sa Team USA apan ang ilang puwersa, sa pagpangulo ni Kemba Walker, usa lang gihapon sa labing gikahadlukan sa kompetisyon. (ESL)