GITUOHANG makahatag og dakong dungog sa Pilipinas ang arnis sa umaabot nga Southeast Asian Games nga ipahigayon dinhi sa nasod sa ulahing bahin ning tuiga.
Ang arnis, nga ka usa natad sa Filipino martial arts ug maoy national sport sa nasod, nagtangag og labing ubos 20 ka gold medals nga ilugan sa mga partisipante.
“Definitely we are looking at dominating arnis so expect to have a gold medal haul,” matod ni 30th Sea Games Competition Manager (CM) ug Philippine Eskrima Kali Arnis Federation (Pekaf) executive vice president Gerald Cañete sa interbyu sa Sun.Star Cebu.
Sa katapusang pag-host sa Pilipinas sa matag duha ka mga tuig nga kompetisyon niadtong 2005, ang arnis usa pa lang ka demonstration sports.
“It is our goal (Pekaf) to make arnis our nation sport and a regular game in the Sea Games,” dugang ni Cañete, kinsa mitambong sa technical delegates meeting kagahapon sa kaulohan.
Sa sayo pa, si Pekaf president Miguel Zubiri miingon nga dili halayo ang posibilidad nga maharos sa Pilipinas ang tanang gold medals sa arnis.
Ang Pilipinas mo-host sa kompetisyon karong Nobiyembre 30 hangtod Disyembre 11.
Tinguha sa Pilipinas nga mapalambo ang 6th place finish niini sa 2017 Kuala Lumpur Sea Games.
Dihang gipahigayon ang kompetisyon sa nasod niadtong 2005, ang Pilipinas maoy nakaangkon sa overall title bawon ang 113 gold medals, 84 silver medals ug 94 bronze medals.
Human niini, nagkagidlay na ang Pilipinas ug ang labing taas na lang nga naabot niini mao ang ikalimang dapit.
Gawas sa Pilipinas, ang ubang partisipanteng nasod sa kompetisyon mao ang Brunei, Cambodia, Indonesia, Laos, Malaysia, Myanmar, Singapore, Thailand, East Timor ug Vietnam. (RSC. ESL)