ANG agila sa pamalak sama sa milupad lamang
Ngadto sa di matukib lapad nga wanang sa kawalaan
Apan may gibilin bulawanong agi sa iyang dagang
Mga sugilanon ug balak sa Sugbuanong katitikan.
Lantip ang mga pulong sa dilang natawhan
Modulot sa pagbati sa naminaw nga dalunggan.
Ang iyang baba may utok nga kaugalingon
Molitok sa pintok ug ugdang mga pulong.
Ang mga pulong hinukad sa iyang dughan
May gihambing pagbati sa mga linupigan.
Ang suwab mohiwa sa garbo sa mapahitas-on
Ang dautang buhat angay gyud pagaputlon.
Ang agila nga sa katitikang Sugbuanon nakasilbi
Pilit nga mopadayon sa panaw sa iyang kinabuhi.
Dinhi ning walog sa mga buhi way motunhay.
Mipauli na siya. Igo lang siya nga miagi dinhi.