MISUOL na sab ang maitom nga tanlag sa Communist Party of the Philippines (CPP) nga gitukod ni Mao Tse Tong sa China atol sa iyang adlawng natawhan sa Dis. 26, 1968. Gimatoto dinhi sa Pilipinas ni Joma Sison. Gitukod ang armadong pakigbisog NPA sa Marso 29, 1969 ug politikanhong pakigbisog NDF sa Abril 17, 1973. Ang CPP-NPA-NDF nakamugna og kinatas-ang rebelyon nga mikalas na og kapin sa 40,000 ka kinabuhi. Walay milampos nga kasabotan sa kalinaw gikan pa ni Pres. Ferdinand Marcos. Gipahigayon sa Oslo, Norway; Kuala Lumpur, Malaysia ug Netherlands gadako lang ang gasto sa gobyerno sulod na sa lima ka dekada.
Nob. 2017 si Pres. Rodrigo Duterte milagda sa proclamation 360 nga nagputol sa sabot-sabot sa kalinaw kay padayong namanhig ug nangatake sa kapolisan bisan paman sa gideklarar nga ceasefire. Dili kasaligan kay dili sila motuo og Ginoo kansang tumong mao ang pagkontrolar sa kalibotan, dugoong rebolusyon ug ilang kalipay ang kasakit sa nasod.
Okt. 2018 ang NPA maoy nag-massacre sa siyam ka mga sakop sa National Federation of Sugar Workers sa Hacienda Nene sa Bulanon, Sagay City, Negros Occidental. Gisakyan ang pagsaulog sa Peasants Month nunot sa massive land grabbing ug land conversion nga ang mga mag-uuma kusganong miduso sa Genuine Agrarian Reform ug sa ilang katungod pagtikad sa yuta. Sila naulipon sa mga agalon nga suholan lang ang kabataan og 80 pesos ang adlaw uban sa ilang mga ginikanan.
Hulyo 2019 miabot og 21 ang napatay sa Negros Oriental. NPA maoy responsabli apan mibalos ang anti-communist group nga Kagubak death squad. Serye sa mga gipatay ang upat ka polis sa Ayungon sila Relebert Beronio, Raffy Callo, Roel Cabillon ug Marquino de Leon. Naglakip nga gipatay sila Atty. Anthony Trinidad, magsoong maestro Arthur ug Ardale Bayawa, Kapitan Romeo Alipan sa Buenavista, Kapitan Ernesto Posadas sa Panubigan, Tanod Anaciancino Rosalita, kanhi Mayor Edcel Enardecido sa Ayungon ug ig-agaw Leo Enardecido, Konsehal Ramon Jalandoni sa Canlaon, Federico Sabejon sa Siaton ug pipila ka rebel returnee. Napasakaan og kaso multiple murder ug theft sila Victoriano Anadon Jr., Jonathan Balvidino, Rengie Anadon, Gelie Anadon Enedo, Joseph Ogates, Rico Oracoy, Lito Cadusale ug ang misibat nga nadakpan sa Badian sa ilang pagtabok gikan sa Ayungon sila Danny Harold Tancinco, Ronie Herebias ug Marlon Basalo kinsa miangkon nga apil pagpatay sa upat ka polis.
CPP-NPA gitala nga terrorist organization sa US, EU, UK, Australia, Canada, New Zealand ug Pilipinas. (csa_1156@yahoo.com/09064648954)