NAGLAOM si Mandaue City Mayor Jonas Cortes nga mas mohugot ug mas molambo pa ang paghatag seguridad ug serbisyo sa kapulisan sa Dakbayan human niya gigahinan og P2.9 milyones nga high-powered firearms sa Biyernes sa buntag.
Moabot sa 12 ka mga armas, nga naglakip sa 10 ka M4 rifles ug duha ka sniper rifles, ang gi-turnover ni Cortes sa Mandaue City Police Office (MCPO).
Atol sa turnover ceremony nga gipahigayon sa MCPO headquarters, si Cortes nanghinaut mas hingusgan niini ang police visibility o ang pagpakatap sa kapulisan sa tibuok siyudad alang sa seguridad ug kahapsay sa mga lugar.
“Nalipay ko sa police visibility sa syudad. Pero mas i-improve pa nato. Di ni nato mahimo kon mag iya-iya tag bugsay. Kinahanglan magtinabangay lang gyud ta”, matod ni Cortes.
May gisaad usab ang mayor nga mga bag-ong radyo ug sakyanan nga posibleng moabot sa di pa motapos ang tuig.
Matod niya nga kinahanglan nga gamiton sa kapulisan ang mga ekipo aron mas marespondehan ang mga panghitabo sa siyudad.
Nagpasalamat hinuon ang direktor sa kapulisan, Police Colonel Jonathan Abella, sa suporta nga gipakita sa mayor.
Alang niya dako og ikatabang ang mga ekipo alang sa mga operasyon, ilabi na nga sagad sa mga durugista karon, giarmasan na.
“Tungod sa threat nato karon nga naay mga armas ang atong mga criminal groups, mas makahatag siya og kompyansa sa atong mga troop nga nahatagan sila og long firearms”, matod ni Abella.
Gidawat usab niya ang mando ug hagit sa mayor nga mas palapdan pa ang scope sa pagpakatap sa kapulisan ingon man ang mas paspas nga komunikasyon. (ANV)