DI PA makabalik ang kapin 200 ka mga vendor sa habig sa Citi Mall paingon sa Land Transportation Office (LTO) 7, lakip na ang duol sa barangay hall sa Kalubihan ug Asian College of Technology (ACT) sa N. Bacalso Avenue, Cebu City.
Ang Prevention Restoration Order Beautificatiom Enhancement (Probe) pinangulohan ni Raquel Arce nilimpyo sa ilang mga illegal structure. Aduna say ningboluntaryo sa pagguba sa ilang mga tindahan para mahibalik ang sidewalk sa libuan ka mga tawo nga moagi sa lugar paingon ug paggawas sa Cebu South Bus Terminal.
Si Arce nagkanayon nga ilang gihawanan ang lugar subay sa kamanduan ni Presidente Rodrigo Duterte nga gipaagi sa Department of Interior and Local Government memerandum circular 2019-121 nga limpyohan gikan sa obstruction ang mga national highway.
Si Mayor Edgardo Labella niumol sa committee of four nga gipangulohan ni Assistant City Administrator June Aragones, Market Administrator Jonil Matuguina, Maria Pino isip representante sa vendor ug Arce.
Si Matuguina nagkanayon nga tan-awon pa sa committee of four ang proposal sa 200 ka mga vendor kon makasadar ba ug masiguro nga di na sila makaali sa mga tawo nga mangagi matag adlaw.
Sagad sa tinda sa mga vendors mao ang shades, biscuits, prutas, pagkaon ug uban pa.
Dugang ni Matuguina nga subay sa imbestigasyon sa Probe, adunay mga vendor nga nagdoble ang pwesto, dagko ang ilang lugar nga nakabara na sa pag-agi sa pedestrians.
Si Labella nagkanayon nga angay limpyohan ang sidewalk alang sa hamugaway nga paglakaw, apan dili sab mahimo nga kulban sa ilang mga kaldero ang mga vendor.
Si Konsehal Junjun Osmeña maoy gitahasan ni Labella pag-andam sa ordinansa aron pag-regulate sa operasyon sa mga vendor.
Ang Probe nigamit sa tema niadtong 2013 hangtod 2016 nga “zero growth” policy sa mga vendor para dilmalukop ang siyudad sa mga ambulant vendor.