SUPERBALITA CEBU

3 mingtahan alang sa ilang ‘proteksyon’

TULO na ka mga Sugboanon nga kombiktado sa heinous crimes nga nabuhian sa Bureau of Corrections (BuCor) tungod sa good conduct time allowance (GCTA) law ningtahan sa kapulisan sa Sugbo sa Miyerkules, Septiyembre 4 ug Biyernes, Septiyembre 6.

Silang tulo ningtahan tungod sa kabalaka nga mamahimo na hinuon silang mga pinangita sa balaud nga unta legal ang ilang paggawas pinasikad sa GCTA.

Wa sila mohatag og bisan usa ka sentimo aron mapahimudsan ang kagawasan.

Usa gani kanila di unta gustong mogawas sa National Bilibid Prisons (NBP) human siya makapuyo og 30 ka tuig tungod kay gawas nga wa na siyay pamilyang ulion, wa na usab siya masayod unsay batasan sa mga tawo sa gawas sa prisohan.

Naa na sa Abellana police station si Jesus Negro, Jr., labing unang ni-surrender sa Bogo Police.Si Negro, lumad nga taga Barangay Dakit, Siyudad sa Bogo, gibalhug sa Abellana Police Station.

Siya napriso sa walo ka mga kasong murder ug usa ka frustrated murder.

Samtang usa ka kombiktado sa kasong robbery with homicide ni-surrender sa Mabolo Police Station.

Si Conrado Cortes, 74, taga Gil Tudtud street, Barangay Mabolo, Siyudad sa Sugbo, nabilanggo sud na sa 28 ka tuig ug niadtong Hunyo 2019 lang nakagawas sa NBP.

Biyernes sa buntag, Septiyembre 6, ntahan usab sa Criminal Investigation and Detection Group 7 si Danilo dela Victoria, 50, nga taga UP compound, Barangay Lahug, siyudad sa Sugbo.

Siya gikombikto sa kasong parricide human niya mapatay ang iyang amahan 30 ka tuig na ang nakalabay.

Disyembre 2018 nakagawas siya sa San Ramon Penal Farm sa Zamboanga City ug nidiretso siyag uli dinhi sa Siyudad sa Sugbo aron makita ang iyang mga mahal sa kinabuhi nga mao ang iyang asawa ug anak.



Mapait nga kasinatian

Emosyonal nga miasoy si Negro sa iyang kinabuhi ug kasinatian sud sa bilanggoan.

Sakop siya kanhi sa gibungkag nga Philippine Constabulary (PC) gikan sa 1986.

Apan ang kalabaryo sa iyang kinabuhi kalit nga niabot tungod sa hitabo niadtong 1988.

Tungod sa giingong pagbinuang sa mga estambay sa Poblacion, Minglanilla kaniya bisan siya usa ka PC, iya kining gipamusil. Walo ka mga tawo ang nangamatay, usa ang nabuhi.

Gidala siya sa National Bilibid Prisons human makombikto sa walo ka mga kasong murder ug frustrated murder.

Sa NBP, didto niya nadiskobrehan ang iyang gugma ug talento sa pagdibuho kun painting.

Nahimo siyang resident teacher sa arts sa NBP hinungdan nga nakadawat siya og mga citation ug certificates sa maayong buhat.

Tungod kay nalingaw na siya sa iyang kinabuhi sa sulod, di na siya gusto unta nga mogawas pa sa bilanggoan.

Laing rason niya mao ang pagbiya sa iyang asawa kaniya niadtong 1988 ug nakigminyo og Amerkano.

Niadto ang iyang asawa sa Amerika dala ang ilang bugtong anak. “Nag-asawa na siya sa America dahil akala ko hindi na ako makalabas pa dahil life sentence yung kaso ko,” matod ni Negro.

Niadtong Agusto 9, 2018, gipahibawo siya sa kadagkoan sa Bucor nga makalaya na siya tungod sa GCTA, apan wa siya mogawas tungod sa kahadlok unsay mahitabo kaniya.

Apan napugos siya tungod kay di na siya maapil sa pagkaon sa sulod.

Sa iyang paggawas wa siyay dalang kwarta hinungdan nga usa ka semana siyang nag-estambay sa Luneta, diin didto usab siya matulog. Apan gidakop na usab siyag pulis gumikan sa pagpangihi sa plaza.

Sa dihang gisultihan niya ang pulis sa iyang sitwasyon, naluoy kini kaniya ug mao nay nitabang kaniya nga makasakay siyag barko pauli dinhi sa Sugbo.

Maayo na unta ang iyang kinabuhi sa gawas tungod kay nitabang siya sa iyang ig-agaw nga mamuhig baboy sa Barangay Dakit ug nagplano pa siya nga motungha sa Technical Education and Skills Development Authority (Tesda) sa lungsod sa Sibonga.Apan naputol ang iyang plano.

Iyang giangkon nga human makita sa telebisyon niadtong Miyerkules sa gabii ang pamahayag ni Presidente Rodrigo Duterte nga pabalikon ang ang kapin sa usa ka libo ka mga kombiktado sa usa ka heinous crime sulod sa 15 ka adlaw, wa na siya maglangan pa pagtahan.

Ning nahitabo nila karon, matod niya, makahiubos kay unta gawasnon na sila tungod sa maayo nilang binuhatan sa sulod sa bilanggoan.

“Naiyak ako kasi mahirap makulong eh. Hindi ka naman tumakas. Hindi ka naman lumayo pero parang makulong ka ulit, ang hirap. Tapos parang malungkot bah,” matod ni Negro.

Iyang giawhag si Duterte nga ipadayon ang GCTA tungod kay daghang mga binilanggo sa NBP nga misobra na ang sentensya ug aduna usay naangin lang sa kaso.

Human siya mahiuli sa ilang dapit, iyang gikahinagbo ang iyang unang uyab kaniadto, kinsa mao na ang niunong kaniya.

Di ba kaha gitakda silang duha sa kapalaran?

Protection

Samtang si Cortes nipasabot nga ang iyang pagtahan proteksyon sa kaugalingon.

“Ang akong pag-surrender protection lang nako nga dili ko ma wanted inig abot sa 15 days nga gihatag sa Presidente. Ang akong pag laya sa medium security compound kanang tarong, walay bayad. Kon gusto sila mo koan, adto sila sa document,” matod ni Cortes

Nagbinuotan siya sulod sa NBP, diin siya nahimong magtutudlo sa refrigeration and airconditioning sukad niadtong 2001.

Gswelduhan siya og P250 ang adlaw sa pagpanudlo.

Sa wa pa siya manudlo, niagi usab siya og training sa Tesda.

Kay niadto pa siyang Hunyo nakagawas, nag-estambay una siya sa ilaha sa Mabolo.

Si dela Victoria, sa iyang bahin, niingon nga sud sa bilanggoan, nakat-on siya sa pagpanghimo og jewelry box.

Mao kini ang iyang panginabuhi sulod sa penal colony.

“Sa palagay ko po, ang desisyon ni Presidente Duterte ngayon parang tama, para ring mali. Ang mali dyan di na kailangan mag surrender pa yung lumaya. Nandoon naman ang records namin. Dahil wala tayong magagawa, dahil siya man ang Presidente, sunod nalang tayo,” matod ni dela Victoria.

Silang tulo nanghimakak nga nakabayad sila sa mga dagkong opisyal sa Bucor hinungdan nga nabuhian sila.

Proseso

Ipaagi sa proseso sama sa mga mangadakpan sa kapulisan ang mga nigtahan nga nakagawas sa bilanggoan tungod sa GCTA, matod ni Lieutenant Colonel Hector Amancia.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph