SUPERBALITA CEBU

Laing ex-convict mitahan

CEBU. Giila ni Cebu Police Provincial Director Colonel Roderick Mariano ang mitahan nga si Alejandro Anana Arquillano, 56, ulitawo, taga Barangay Consuelo, lungsod sa San Francisco, isla sa Camotes. (Hulagway iya sa San Francisco Police Station)

NITAHAN sa San Francisco Police Station, isla sa Camotes, ang 56-anyos nga ex-convict sa kasong rape ug attempted rape with homicide nga gisentansyahan nga mabilanggo sa tibuok kinabuhi niadtong 1991.

Ang ni-surrender mao si Alejandro Anana Arquillano, 56, ulitawo, taga Barangay Consuelo, lungsod sa San Francisco.

Nakagawas siya niadtong Agusto 19, 2019 gikan sa Iwahig Prsion and Penal Farm sa Puerto Princesa, Palawan human makabenepisyo sa good conduct time allowance (GCTA).

Ang iyang release order gipirmahan ni Geraldo Aro, colony superintendent.

Gisentensyahan siya niadtong 1991 sa kasong rape ug attempted rape with homicide apan niabot na og 28 ka tuig ang iyang serbisyo sulod sa bilanggoan sukad siya gipriso.

Matod ni Police Sergeant Rommel Mortejo, desk officer sa San Francisco Police Station, nga human makaabot sa Barangay Consuelo si Arquillano, naa ra kini kanunay sa ilang balay uban sa iyang inahan.

Human makadungog sa mga balita sa radyo nga mimando si Presidente Rodrigo Duterte nga ipabalik sila sa Bureau of Corrections (BuCor), nahadlok na siya, dali nga nitahan sa labing duol nga police station.

“Ingon sa iyang mama kay buhi pa man ni iyang mama, naa ra kuno ni kanunay sa ilang balay sukad ni naabot adtong miaging buwan,” matod ni Mortejo.

Gipaabot nalang ang mando gikan sa Provincial Police Office kon kanus-a dalhon sa mainland Cebu si Arquillano. Siya kasamtangan nga ikustodiya sa Criminal Investigation and Detection Group 7.

Ang CIDG-7 ang gitahasan nga motigom sa mga kombiktado nga nabuhian tungod sa GCTA.

Si Police Colonel Roderick Mariano, director sa kapulisan sa probinsya sa Sugbo, nagpaabot pa sa ubang mga nabuhian sa BuCor sanglit wala silay listahan nga gihuptan kon aduna pa ba.

Una nang ningtahan ang laing tulo ka mga ex-convict nga sila si Jesus Negro Jr., Conrado Cortes ug Danilo de la Victoria.

Si Negro nitahan sa kapulisan sa Dakbayan sa Bogo, samtang sila si Cortes ug de la Victoria sa Mabolo Police Station sa Dakbayan sa Sugbo.

Ang tulo naa sa custody sa CIDG 7.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph