GIRONDA sa mga sakop sa Criminal Investigation and Detection Group 7 (CIDG 7) ang usa ka condominium sa Barangay Mactan, Siyudad sa Lapu-Lapu, Sabado sa buntag, Septiyembre 7, 2019 tungod sa giingong illegal online gambling.
Kapin sa 200 ka mga Chinese national gipangsikop sa kapulisan nga naabtan sa ilang mga cubicle ug nag-operate sa pasugalan sa internet.
Gipangkuha usab sa mga pulis ang gatusan ka computer sets nga maoy ilang gigamit sa illegal nga pasugal.
Matod ni Police Lieutenant Colonel Hector Amancia, deputy chief sa CIDG 7, nga ang ilang operation pinasikad sa search warrant nga giluwatan ni Judge Soliver Perras sa Regional Trial Court (RTC) Branch 10.
Nilanat og walo ka buwan nga gipaubos sa surveillance ang online gambling human sila makadawat sa impormasyon.
Nagpatuo kini nga usa ka business process outsourcing (BPO) nga mao usab ang ilang gipakita nga papeles sa mga sakop CIDG 7.
Apan sa dihang gipangayoan og lisensya gikan sa Philippine Charity Sweepstakes Office, wa silay ikapakita.
“Naa silay gipakita ang accreditation sa Pagcor as service provider sila sa BPO. Murag call center bah. Pero atong gipangitaan og necessary permit sa ilang operation sa gambling kay naa may supposedly appropriate license nga iisyu sa Pagcor, kanang Pogo (Philippine Offshore Gaming Operators),” matod ni Amancia.
Gipaubos pa sa imbestigasyon ang kapin sa 200 ka mga Chinese national nga nadakpan ug sunod semana pa sila mahimong mapasakaan og kaso.
Mag-atubang sila og kasong kalapasan sa Republic Act 1602 in relation sa 10175 nunot sa paggamit niini sa internet sa illegal gambling.
Taas ang ilang surveillance tungod kay ilang gisiguro nga makakuha silag sakto nga impormasyon sama sa pagpasulod og tawo sa kompaniya.
Sa dihang nakompleto ang kasayuran, ni-apply dayon sila sa korte og search warrant nga giaprobahan usab dayon ni Perras.
Maningil og buhis
Gibutyag ni Lapu-Lapu City Mayor Junard “Ahong” Chan nga pipila sa mga girondang online gaming operator sa Brgy. Mactan gamay ang gideklarar nga income sa City Treasurer’s Office hinungdan nga iya kining gipasusi pagbalik kon insakto ba ang deklarasyon alang sa maong matang sa negosyo.
Mga taga CTO nanglibot gilayon human momando si Chan sa pagsusi. (AYB & GCM)