NASAYRAN nga mobalik sa pag-eskuwula si World Boxing Organization (WBO) welterweight champion Manny Pacquiao.
Ang Pambansang Kamao ng Pilipinas nag-post sa iyang Twitter account sa hulagway sa iyang ID sa University of Makati diin giingong nagkuha siya og kursong political science ug local government administration.
Napatik kini sa www.abs-cbnnews.com.
Ang post sa bugtong 8-division world champion adunay caption nga: “Never stop learning because life never stops teaching.”
Ning iyang gibuhat, si Pacquiao, 40, giuwan og mga pagdayeg gumikan kay bisan kalampusan sa boksing, mga negusyo ug pulitika, gihatagan gihapon niini og gibug-aton ang pagkamahinungdanon sa edukasyon.
Sa laing bahin, nagtuo si Albert Benson, kolumnista sa www.nowboxing.com, nga kuli nga mahitabo nga ikaharong ni Pacquiao sa umaabot ang modaog unification bout nila ni International Boxing Federation (IBF) welterweight champion Errol Spence Jr. ug World Boxing Council (WBC) king Shawn Porter karong Septiyembre 28.
Sa katapusang away ni Spence Jr., iyang gilupig si Mikey Garcia pinaagi sa unanimous decision.
Human ning awaya, nipadayag si Spence Jr. nga gusto siyang makig-away ni Pacquiao. Mitando man tuod si Pacquiao niini apan wala nahitabo ang away.
Alang kang Benson, ang rason nga wala madayon ang away gumikan kay nagpanagana si Pacquiao nga makig-away kang Spence Jr.
Nagtuo si Benson nga nasayod ang 40 anyos nga si Pacquiao nga makatilaw kini og kastigo batok sa 29 anyos nga si Spence Jr., kinsa usa ka lehitimong knockout artist nga adunay 25-0, 21KOs nga rekord. (ESL)