KAPIN 500 ka mga gradwado ug kanhi mga tinun-an sa Roberto E. Sato Memorial National High School ang nisaulog sa ika-25 nga founding anniversary sa tunghaan niadtong Agusto 3, 2019.
Ang kasaulogan gidungan usab sa ikaduha nga Grand Alumni Homecoming nga gipahigayon sa dakong hawanan sa tunghaan sa Barangay Calidngan, siyudad sa Carcar.
Kini nagdala sa tema nga “Clinching the Graduates with a Silver Lining.”
Ang kalihokan gisugdan pinaagi sa registration sa alas 7:30 sa buntag. Gisunod ang misa sa alas 8 sa buntag ug dayon ang caravan sa alas 9 sa buntag. Ang mga sakyanan nanukad sa tunghaan ug gilibot ang mga dalan sa mga barangay Buenavista, Valencia ug nibalik sa RESMNHS.
Sa pagsugod sa programa, gihimo ang piniliay sa bag-ong set sa mga opisyal sa matag batch ug dayon sa grand alumni sa RESMNHS.
Gipresentar ang lainlaing mga batch sa mga gradwado sukad sa 1998 hangtod sa 2019 sa maong kalihokan.
Sa programa usab, gi-unveil ang bust sa estatuwa ni anhing manlalaban Leto Sato, ang tag-iya sa yuta nga maoy gitukoran sa eskwelahan.
Ang gahimo sa estatuwa ang alumnus usab sa RESMNHS ug local artist sa Carcar nga si Christopher Rentucan.
Ang pangan sa eskwelahan kay gikuha gikan sa usa ka anak ni Leto nga si Roberto nga maoy nagdonar sa luna.
Sa samang programa, gihatagan og pasidungog ang laing anak ni Leto nga si Atanacio Sato, ang founder sa tunghaan.
Nitunol usab og tokens ang mga faculty ug staff sa RESMNHS pinangulohan ni Violene Castañares, ngadto sa pipila ka mga miyembro sa banayng Sato pinangulohan ni Atanacio, agi og pagpasalamat sa ilang pagdonar og luna aron dunay katukoran og tunghaan alang sa kabataan sa Barangay Calidngan.
Apil sa nakadawat og tokens ang kanhi mga magtutudlo ug principal sa eskwelahan.
Nagpasiklabay usab sa mga pasundayag ang lainlaing mga batch sa mga gradwado.
Sa wala pa mahuman ang programa, gihimo ang oath taking sa bag-ong set sa mga opisyal sa grand alumni ug Parents-Teachers Association (PTA) sa RESMNHS nga gipangulohan ni Maricor Alcordo, barangay kapitan sa Calidngan, kinsa gradwado usab sa maong tunghaan. Kini inubanan ni Public Schools District Supervisor Marina Alcuizar, alumna usab sa RESMNHS.
Ang nag-organize sa dakong mga kalihokan kay ang faculty ug staff sa RESMNHS inabagan sa mga opisyal sa PTA. (SCG)