DUNA koy higala nga bag-o lang nabuang sa mountain bike. Di lang nako nganlan kay magsige ra ba og basa ning akong column. Maorag ang ako ra bang column ang usa sa naka influence niya sa pagsikad. Updated ko sa ilang mga ride kay Facebook friend man nako siya.
Nahimuot ko kay iya kong gipahibawo nga bisan unsaon niya og sikad, mabiyaan kuno siya sa panon. Bisan kuno og babaye, labina kuno kon gwapa, maglisod siya og apas. Akong gitan-aw ang iyang crankset o chainset, medyo gamay ra tuod. But di kaayo dako og deperensya sa uban nga nag-two ring crank. Kon nabiyaan siya, sa akong pagtuo, hayan tungod kay bag-o pa siya.
Sakto ang akong ikaduhang pagtuo. Nipahibawo siya nako nga makaapas na kuno siya. Practice ra diay ang iyang gikinahanglan, sulti pa niya.
Bitaw, naa tay notion ba nga kusog na kaayo ang cadence sa atoang tindak, labina kon bag-o pa ta, apan sa tinuod, kuwang pa ang pace sa sikad. Mao usab ni ang akoang na-experience dihang mao pay pagsugod nako og sikad.
Magkatawa kong mahinumdom nga pwerte na kunohay nakong sikad pero wa ko makaapas sa akong mga kauban. Diay, gawas nga hinay pa ang cadence nako, wa pa masuhito sa pangambyada mao nga usahay gamay ang akong front ring gigamit ug dako sa likod.
Tindak og sige
Bisan kinsa pa ang imong pangutan-on, bentaha kon at least makatulo sa usa ka semana ka makasikad, bisan lang sa bike trainer sa balay. Bisan unsa nga matang sa paugnat sa kusog, kon di regular ang paghimo, di mosaka ang imong performance. Mao na ang uban mokuhag trainer nga mobuhat kanila og program.
Ang akong guide sa biseklita mao ang libro sa health. Gisuwat ni, nga dunay gamay nga program, sa mga eksperto. Mao nang as much as possible, sa di pa ang long ride sa weekend kaniadto, mosikad una ko sa kabukiran nga duol ra sa amoa. Pangandam ni sa akong lawas alang sa mas grabe pang tinungasay.
Manglaba
Sa una, among kantyaway basta tungason na gani kaayo unya taas pa, ang kanang “giingnan sa asawa nga manglaba, mosikad gyud. Tan-awa na unsa na.” Usahay bitaw, kanang grabe ang subida ug init pa kaayo, makaingon kang mas maayo pang manglaba.
Bitaw, kanang mabag-ohan ka, unyag ka gabii, maora kag gibunalbunalan sa tibuok kalawasan. Nahinumdom pa ko nga dihay Huwebes Santo, una nakong long ride padung sa Carcar, uban ang among kanhi photographer nga si Allan Defensor.
Pag-uli nako sa balay mga alas 4 na sa hapon, hait na kaayog tinan-awan ang akong asawa. Wa ko makakuyog nila sa last mass. Bisan giunsa nako, wa na nako makaya ang kakapoy. Nakatug man tuod ko nianang gabii, apan nag-alindasay sa kasakit. Ingon ko mas gaan ang manglaba.