Binasi sa Kinaadman 9:13-18; Salmo 90; Filemon 9-17; Lucas 14:25-33
KARONG adlawa atong gisaulog ang adlawng natawhan sa Birhen Maria. Wala hisgoti ang “birthday” ni Maria sa Biblia. Apan, sumala sa atong tradisyon, si Joachin ug si Ana ang iyang ginikanan. Giumol siya isip usa ka magtutuong Judio. Nagaampo siya matag adlaw, dili mokaon og baboy, mitahod sa mga katigulangan sa mga Judio nga sila Abraham, Isaac, ug Jacob. Naghulat pod siya sa umaabot nga kaluwasan sa Israel, ang pagtukod pag-usab sa gingharian ni David.
Ang “birthdays” usa ka kasaulogan sa pamilya. Sa atong pagsaulog sa birthday sa atong langitnong inahan, gisaulog ug gipasalamatan usab nato ang gasa sa banay. Sayod kita nga walay hingpit nga banay kay may nakaapan sa mga sakop niini.
Bisan pa man niini, wala nato damha ang mga pulong ni Jesus sa ebanghelyo. Kon sundon gyod nato ang orighinal nga Griyego kini nagkanayon: “Kon kinsa ganiy moanhi ngari kanako nga wala masilag sa iyang amahan, inahan, asawa, mga anak, mga igsoong lalaki, ug mga igsoong babaye, bisan gani sa iyang kaugalingong kinabuhi, dili siya mahimong akong tinun-an”. Kon ato kining hubaron aron masabtan gyod, kini nagkanayon: “Kon kinsa ganiy moanhi ngari kanako ug dili mahigugma kanako labaw pa sa iyang amahan...”
Wala diay kini magpasabot nga masilag kita sa mga sakop sa atong banay kondili nga higugmaon nato ang Ginoo labaw sa tanan. Kon magtinahoray man gani kita sa usag-usa binasi kini sa atong pagkaminugna sa Dios ug pagkabinunyagan isip Kristohanon. Kon mopatuo man gani kita sa atong mga ginikanan tungod kini kay sila mga piniyalan sa Dios alang sa kaayohan sa anak.
Kon adunay ipahimo ang ginikanan nga sukwahi sa balaod sa Dios, dili kini angay himuon sa anak. Makita ni nato, pananglit, sa mga subo kaayo nga kaso diin gigamit sa ginikanan ang anak sa gitawag nga “cyber-sex”. Mahimo sad nga may bokasyon sa pagkapari o pagkamadre ang anak apan dili motugot ang ginikanan. Dili sayon ang pagmahal sa Dios labaw sa tanan.
Usahay dili dali ang pagdesidir. May proseso kini. Sagad tawhanong pamaagi lamang ang nalakip sa proseso. Nagkanayon ang libro sa Kinaadman mahitungod sa Ginoo nga “kinsa may nasayod sa imong tambag, gawas kon imo siyang gihatagan og kinaadman ug gipadala ang imong espiritu santo gikan sa kahitas-an?” Kinahanglan diay mokanaog ang Ginoo sa atong lebel aron mahimong tul-id ang atong mga dalan.
Sinultihan sa banay ang gigamit ni Pablo sa iyang sulat ngadto kang Filemon. Gihangyo niya si Filemon nga dawaton og usab si Onesimus nga iyang ulipon nga mingkagiw, ug dili na siya silotan. Amahan ni Onesimus ang pagtan-aw ni Pablo sa iyang kaugalingon.
Kitang tanan minugna sa Dios ug mga igsoon sa atong pagkabinunyagan. Ang birthday ni Maria birthday sa matag usa nga magtutuo kay siya ang atong inahan, panig-ingnan, ug dangpanan.
Gisangpit na ba nato ang atong langitnong inahan sa iyang adlaw nga natawhan?