SUPERBALITA CEBU

Mongaya: Padayon sa centennial celebration

Panahom

DI UYON si Presidente Rodrigo Roa Duterte nga suportahan sa kagamhanan ang kasaulogan sa ikalimang sentenyal sa Kristyanismo dinhi sa Pilipinas karong 2021.

Ika-500 ka tuig o ika-5 nga sentenyal na man gud karong 2021 sa pag-abot ni Ferdinand Magellan dinhi sa Sugbo ug gipahigayon ang usa ka misa ug pagbunyag ni Rajah Humabon, Rayna Juana, ug ilang mga ginsakpan.

Gigasa ni Magellan ang imahen ni Birhen Maria ug Santo Niño kang Rayna Juana. Ang imahen ni Señor Santo Niño naa hangtod karon sa Basilica del Santo Niño nga maoy sentro sa pagsaulog sa Sugbo sa Sinulog Festival kada Enero.

Apan wala makauyon niini si Presidente Duterte kay, matod pa niya, nianhi ang mga Katsila dala ang mga kanyon ug ang Krus. Dayon ang mga lumad, nigakos sab dayon sa Krus.

Usa kini sa mahinungdanong punto nga gipamulong sa Presidente atol sa iyang pagbisita sa Syudad sa Naga sa miaging adlaw dihang nag-groundbreaking ang housing project alang sa mga nabiktima sa dakong landslide sa miaging tuig.

Nibisita si Presidente Duterte sa Naga usa ka adlaw human ang Charter Day niini ug adlawng natawhan ni Mayor Val Chiong. Happy birthday mayor!

Alang kanako, usa kini ka punto de bista sa usa ka nationalist. Gigamit man gyud sa mga Katsila ang kombinasyon sa armas ug relihiyon aron mahimo kitang ulipon ubos sa kapin sa 300 ka tuig. Ato lang napalayas ang mga Katsila dihang nialsa ang katawhang Pilipino ubos sa liderato sa Katipunan.

Lapu-Lapu

Ang ako lang kay ang 2021 sab mao ang ika-500 ka tuig o ika-5 nga sentenyal nga atong napildi ang mga Katsila ubos sa liderato ni Lapu-Lapu.

Ato bayang napalayas ang mga Katsila niadtong tungora.

Gani, di man kita makaingon nga hingpit ang paggakos dayon sa mga Sugboanon sa mga langyaw kay human sa pagkapildi nilang Magellan sa Mactan, moabot og 30 kanila ang gimasaker dinhi sa Sugbo ubos sa pagmando ni Rajah Humabon.

Nahinumdoman sab sa nahabiling mga Katsila dihang nagdalidali sila og eskapo sakay sa nahabiling mga galleon ang talan-awon nga gisunog ang krus ni Magellan nga giugbok alang sa pagbunyag.

Kining makita nato karon nga Magellan’s cross diha tungod sa Basilica ug Cebu City Hall dili na man kana ang orihinal nga cross ni Magellan.

Busa, alang kanako, angayang saulogon ang sentenyal labi na diha sa isla sa Mactan. Ang kadaugan sa Pilipino ubos sa liderato ni Lapu-Lapu tipik na sa world history.

Si Mayor Ahong Chan mao ang angayang mag-una sa maong selebrasyon sa ika-5 nga sentenyal sa kadaugan ni Lapu-Lapu ug sa Pilipino batok sa kolonyalismo.

Bisan pa, angay saulogon ang ika-5 nga sentenyal sa Kristyanismo apan ang sentro mao ang Simbahang Katoliko labi na ang kapari-an sa Basilica del Santo Niño. (@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph