PIPILA ka Dabawenyos nga hawud sa arnis ang mipakita’g gilas ning bag-o lang sa usa ka kompetisyon sa Sugbo.
Sa nakalabay nga World Invitational Arnis Full Contanct Live Stick Fighting Cocoy Doce Pares Centennial Cup, tulo ka mga magduduwa gikan Davao ang mibitbit og dungog alang sa siyudad.
Ang kompetisyon nga namugna isip paghinumdum ug pasidungog sa legendary supreme grandmaster Cocoy Cañete gihimo Agosto 8-11 ning tuig sa Ayala Center Cebu Sports Club.
Ang Team Davao Eagles, Pableo Martial Arts sa pagpanguna ni playing head coach Master Elizar ‘Ely’ Gamboa mibitbit sa ngalan sa Davao uban ang lain pang mga magduduwa.
Atol sa kompetisyon si Gamboa midaug og silver sa double stick ug bronse sa single stick category.
Samtang ang senior high school student nga si Alessandra Alejandre mibunal og gold medal sa extra lightweight division.
Samtang si Jovaci Andrew Ramirez, estudyante sa Precious International School of Davao namunal og bronse.
Si Aljandre miangkon nga di sayon ang pagbalanse sa iyang oras sa training ug pag-eskwela.
“I trained to condition myself preparing for the tournament and it helps me improve my endurance, power and speed in order for me not just to win in the game but to enjoy my game.”
Niya, bisan og di sayon nga dungan ang training ug pag-eskwela apan, nabayran ang tanang kahagu sa nakuha niyang medalya.
“I need to prioritize both my sport and academics through time management.”
Ang kompetisyon giapilan sa 300 ka partisipante sa upat ka kategoriya gikan sa nagkadaiyang parte sa kalibutan.