PANABO CITY -- Anaa sa talandugon nga kahimtang ang giingong bodyguard ni Pantukan Mayor Roverto Yugo human gipusil sa wa pa mailhing mamumuno gawas sa iyang KTV Bar alas 8:30 sa gabii, niadtong Huwebes, Septiyembre 5, sa Purok 12, Barangay San Vicente ning dakbayan.
Ang biktima giila sa Directorate for Intelligence sa Panabo City Police Station nga si Armando Mejares Escodero, alyas Sano, 53-anyos, ug usa sab ka negusyante nga tag-iya sa No-San KTV Bar.
Una niini, nagtaod og Christmas lights ang biktima gawas sa iyang bar uban ang usa sa iyang mga waiter nga si Elmer Luna, 33-anyos dihang kalit mibutho ang mamumuno nga sakay sa motorsiklo dayon namusil.
Nadala pa sa ospital si Escodero kinsa anaa sa talandugon nga kahimtang samtang si Luna dead on the spot.
Sa gipagula nga progress report sa Panabo City PNP, nasayran nga anaa na sa listahan si Escodero nga leader sa gun-for-hire group nga naglihukan sa Davao del Norte ug sa Compostela Valley Province.
Disyembre 2015 nasikop si Escodero sa Regional Intelligence Division ug sa Panabo City PNP pinaagi sa gahum sa warrant of arrest sa kalapasan sa Republic Act 10591 dunay criminal case number 340/341-2015 nga gi-isyu ni Honorable Judge Dax Gonzaga sa Regional Trial Court Branch 34 sa Panabo City, apan nakagula kini kay nakapiyansa.
Kasamtangan anaa si Escodero sa intensive care unit sa Davao Regional Medical Hospital sa Tagum City human nakahiagom og mga samad-pinusilan sa ulo samtang gipahiluna na ang patay nga lawas ni Luna sa Villa Funeral Parlor sa Barangay Salvacion, Panabo City.
Kapulisan sa Panabo PNP naghimo na og makuting imbestigasyon sa kaso aron matumbok ang responsable sa krimen samtang wala pa matumbok ang kinauyokan nga motibo sa krimen. (Jeepy P. Compio)