DUHA sa tulo ka mga Chiong 7 convicts sa paglugos-pagpatay sa magsuong Marijoy ug Jacqueline Chiong ningtahan, duha ka mga adlaw human si Presidente Rodrigo Duterte nidemanda pagpatahan kanila sulod sa 15 ka adlaw.
Sila si kanhi convicts Ariel Balansag ug Alberto Caño, kinsa gipagawas sa miaging buwan pinasikad sa Good Conduct Time Allowance (GCTA) law, ningtahan niadtong Biyernes, Septiyembre 6, 2019.
Naa sila karon sa New Bilibid Prison, matod ni Justice Undersecretary Markk Perete sa Sunstar Cebu.
“Bureau of Corrections has confirmed their surrender. Based on the Bureau’s report, the two have been processed for re-commitment and are already inside (the) Bilibid,” nagkanayon si Perete.
Niadton Miyerkules, Septiyembre 4, 2019, si Duterte niisyu og 15 ka adlaw nga ultimatum sa 1, 914 ka kanhi inmates nga nakagawas ubos sa GCTA law.
Si Thelma Chiong, inahan sa magsuong Marijoy ug Jacqueline, niingon nga siya nalipay sa mao nga kalambuan.
“Lipay kaayo ko oy kay at least di na ta mangita nila ba. Kusa ra jud sila ni surrender. Maayo jud sila kaayo. Nahadlok sad sila, wala pay 15 days. Naa jud tingali nakatambag nila ,” siya nagkanayon.
Wa pa masayri hain si Josman Aznar, ang ikatulong convict nga nakagawas. (WBS)