NAMATAY ang usa ka gikatahapang tulisan human ma-slide ug mahulog sa atop sa balay sa iyang tinguha untang pag-eskapo gikan sa mga lumolupyo sa Barangay Tejero, Dakbayan sa Sugbo, nga ninggukod kaniya niadtong Biyernes sa gabii, Septiyembre 6, 2019.
Wa pa mailhi ang mao nga lalake, kinsa nakaplagan nga dunay samad pinusilan sa paghiling sa mga medical personnel nga niresponde sa alarma.
Siya gitumbok sa usa ka habalhabal drayber nga motulis unta ug moilog sa motorsiklo, apan napakyas kay nakapangayog tabang ang driver.
Matod ni Police Maj. Joemar Pomarejos, hepe sa Waterfront Police Station, si Jojo Jimenez, taga Barangay Jagobiao, Dakbayan sa Mandaue, habal habal drayber, mao untay tulison.
Nakadawat silag alarma sa kagubot sa mga tawo sa Tejero hinungdan nga ilang girespondihan.
Didto na nila nahibaw-an nga usa ka gikatahapang tulisan gigukod sa mga tawo.
Ang lalake nikakat sa atop sa kabalayan aron unta moeskapo.
Sa iyang pagdinagan, na-slide sa atop ug nahulog.
Pag-abot sa medical personnel sa Siyudad, naligo na kini sa dugo ug patay na.
Sa pagsuwat ning taho, wa pa siya mailhi.
Sa paghiling sa mga sakop sa Scene of the Crime Operations (Soco) nasuta nga dunay samad pinusilan sa lawas ang lalake hinungdan nga siya nahulog gikan sa atop.
Si Jimenez nga nahinabi sa Superbalita Cebu niingon nga duna siyay gihatod nga pasahero gikan sa Dakbayan sa Mandaue.
Usa ka lalake nga nagtaptap sa nawong nisakay kaniya gikan sa Barangay Parian, apan tulis diay ang tumong.
Buot pa unta ilugon ang iyang motorsiklo hinungdan nga nangayo siyag panabang.
Duha ka mga tawo ning tabang kang Jimenez hinungdan nga nahitabo ang gukdanay.
Si Jojo Cañete, tag-iya sa balay nga tupad sa natagakan sa tulisan, niingon nga nakadungog sila og mga buto sa pusil.
Gikulata
Sa pikas bahin, usa ka lalake naputos sa bun-og human kulataha sa mga residente sa Barangay Tejero human masakpi nga nangawat og manok nga pangtari.
Ang suspek mao si Reno Macasero, 34, taga Lower Malibo, Barangay Subangdaku, Dakbayan sa Mandaue.
Human niya giingong makawat ang manok ug naglakaw, iyang naagian ang tapok sa mga lalake nga nag-inom.
Iya kining gihagad og P500 ngadto sa mga nag-inom, apan wa siya masayod nga usa sa mga lalake maoy tag-iya sa manok.
Dinhi, gitabangan siya sa pagkulata sa mga estambay.
Ang hitabo sa barangay gipa-blotter.