LAING dungog na sab ang nadawat sa garbo sa Davao, ang Malagos Chocolates, kini human sila midawat og duha ka pag-ila sa London-based Great Taste Awards.
Kabahin niini, mapasigarbuhong gipadayag sa Malagos nga anaa na's siyam ka Great Taste seals of approval ang ilang naangkon sukad 2016.
Ang Great Taste, gihulagway nga Oscar’s sa natad sa pagkaon, ug inila sa “fine food and drink” sa United Kingdom.
Dunay 12,772 ka produktong mi-apil ning tuiga, diin 38 porsyento ka entries lang ang narekognisa sa Great Taste.
Kapin 500 ka hurado, apil na mga gibansay nga food writers ang mihukom sud sa 75 ka adlaw gikan Marso ngadto Hulyo ning tuig.
Sayo ning tuiga, midaug sab ang Malagos og lima ka pag-ila gikan sa Academy of Chocolate, diin ang farm nila nga Puentespina Farm naila ug gipili nga "Heirloom producers of quality and flavor cacao beans" sa Heirloom Cacao Preservation Fund, kapartner ang Fine Chocolate Industry Association (FCIA)ug U.S Department of Agriculture (USDA).
Sa kasamtangan midawat na ang kompanya og 36 ka international, usa ka Gold national awards, ug lima ka komendasyon.
Suma pa nga ang bag-ong kalampusan nga naangkon nila, kalampusan sab sa mga cacao farmers.