SA sinugdanan dako kaayo ang pagsalig ni Presidente Rodrigo Duterte sa katakos ni Magdalo Nicanor Faeldon, nga una nang gisalig sa presidente sa iya ang pagdumala sa talamak nga kurapsiyon sa Bureau of Customs (BOC).
Human siya nalutsan sa container van nga dunay mga shabu nga balor og P6.4 billion nga gi-alegar pa nga naapil ang anak sa atong presidente ug usa ka konsehal dinhi sa Dakbayan sa Davao.
Gipalaylo dayon siya sa makadyot, human gibutang na usab sa usa ka sensitibo nga posisyon nga mao ang Bureau of Corrections (BuCor) sa National Bilibid Prison, nga ang isyu niini kaniadto mao ang linuto-ay og mga ginadili nga drugas sulod mismo sa mga selda sa mga high profile inmates kun diin nalambigit si Senador Leila de Lima nga maoy nagproteksiyon.
Sa sinugdanan daghan ang natingala nganong gihatagan pa sa atong presidente si Faeldon og laing higayon, nga ibutang pa sa kontrobersiyal nga posisyon ang hepe sa BuCor, may dako naman nga sala nga nahimo sa posisyon nga iyang gibiyaan?
Sila daw si Peter Laviña nga gibutang sa National Irrigation Administration (NIA) ug si Mike Sueño sa Department of Interior and Local Government (DILG) nga nakatabang gyud sa kampanya sa milabay nga 2016 elections, nasapli man dayon nga wala gani’y imbestigasyon? Unsa gyud daw kadako sa sala nga nahimo ni Laviña ug Sueño?
Daghan ang nagtuo nga dili kuno kurap si Faeldon, gisaligan daw sa presidente sa pagdiskubre sa mga ahensiya sa gobyerno nga nahimong kontrobersiyal, pwede pud madawat kanang katarungana, pero, kun tinuod nga dunay pagpanapi ginamit ang Republic Act 10592, kun “Good Conduct Time Allowances” (GCTA) Law nganong miabot pa og 1,700 ka mga binilanggo ang gipagawas niya nga wa gani pahibaw-a ang Department of Justice (DOJ).
Kurap? O tigdiskubre sa kurapsyon sa ahensiya sa gobyerno, ug ang lain pa nga pangutana nganong dunay daghang mga heinous crime convicted inmates nga iyang gipamuhi-an? Ug matud pa sa mga mitestigo dunay mga bayad ang gipagawas gikan sa P50,000 ngadto na sa P100,000 ngadto na sa P1 million? Motuo ka ha ta nga wala siya masayod ug wala siya’y bahin? Kon wala, unsay tawag nato sa iya, ignorante?
Ang kampanya sa administrasyon sa atong presidente batok droga ug kurapsyon, pero unsay nakita nato karon misiaw ang droga ug kurapsyon, hinuon, wala kini makalabaw sa daghang development nga gipakita sa presidente karong panahona, pero kini gyud ang isyu nga iduot-duot pag-ayo sa “yellow-han” nga ang sayop lang ang kanunay gibantayan.
Hinaut nga dili hatagan sa atong presidente si Faeldon og lain pa nga possisyon aron dili madaut ang tulo ka tuig nga naghinapos sa iyang administrasyon.