DIGOS CITY -- Nakasinati og long weekend ang mga molupyo sa Dakbayan sa Digos human gideklara sa Malacañang nga “Special Non-working Holiday” karong adlawa, Septiyembre 9, alang sa mga molupyo sa dakbayan.
Kini human natunong sa adlaw’ng Dominggo, Septyembre 8, ang pagsaulog sa ika-19 nga Araw ng Digos.
Subay sa Proclamation 798 nga gilagdaan ni Executive Secretary Salvador Medialdea, subay sa pagtugot ni Presidente Rodrigo Duterte, gitataw niini nga ang deklarasyon naghatag og kahigayonan sa mga Digoseñue nga masaulog ang selebrasyon.
Mismong ang buhatan sa mayor ang nangayo og holiday alang sa katawhan sa dakbayan.
Gumikan niini walay klase ang mga pampubliko ug pribadong tunghaan ug wala sab opisina ang mga buhatan sa nasyonal ug local nga ahensya sa kagamhanan.
Samtang, usa sa gikagubtan sa publiko kagahapong adlawa mao ang tradisyonal nga “Lechonan sa Kadalanan” diin aduna’y libreng mga tiket alang sa “eat all you can” sa mga lechon ug aduna sab pakapin nga puso ug softdrinks.
Nianang pagka-gabii, nalingaw sab ang publiko sa “Hudyaka sa Kadalanan” nga gibutang sa dalang Rizal Avenue.