DIGOS CITY -- Gibiyaan sa namatay’ng agent sa Philippine Drug Enforcement Agency (PDEA) ang iyang upat ka bulan nga anak nga bag-ong gibunyagan sa miaging semana nga gitambungan pa sa biktima una kini mibalik sa trabaho.
Miabot na sa ilang pinuy-anan sa Crumb Street sa Dakbayan sa Davao ang patay’ng lawas ni Agent Jack Roland Bastatas, hamtong, alas 6:00 sa gabii niadtong Huwebes, Septiyembre 5.
Kahinumduman nga si Bastatas ang napatay atol sa operasyong gilusad sa PDEA didto sa Ipil, Zambaoanga Sibugay human napusilan sa mga suspek nga ilang target sa operasyon niadtong Lunes, Septyembre 2.
Hilabihan ang gibating kasubo sa amahan niining si Rolando, apan mapasalamaton gihapon ang pamilya tungod sa suporta nga gihatag kanila sa PDEA ug sa mga opisyal sa ahensya.
Atol sa operasyon, napatay sab sa PDEA ang mga durugista nga sila Jan-jan Mauli, Ibrahim Cula, ug Absar Cula, giingong mga sakop sa Moro Islamic Liberation Front (MILF).
Narekober ang mga tag-as nga kalibre sa armas atol sa operasyon.
Naangol sab sa operasyon si Police Corporal Richie Janeo sa Regional Drug Enforcement Unit sa Zamboanga Peninsula.
Luyo sa nahitabo, mas hingusgan sa PDEA, ang ilang hugot nga kampanya batok sa ginadiling druga.
Gibutyag ni PDEA director General Aaron Aquino, nga di sila moundang sa ilang mandato ingon ug sa kampanya sa kagamhanan nga gukdon ang mga tawong padayong nagpayuhot sa ilegal nga drugsa.