TACURONG CITY -- Gikondena sa militar ug kapulisan ang malimbungong pag-atake sa mga terorista sa Isulan, Sultan Kudarat Sabado, Septiyembre 7, 2019.
Sa hitabo, walo ka sibilyan ang naangol sa pagbuto sa usa ka improvised explosive device (IED) sa naka-park nga mga motor duol sa publikong merkado sa Barangay Calawag 3, Isulan, SulKud.
Babaye ang nakit-an sa closed-circuit television (CCTV) camera nga maoy nagbilin sa bomba, sexy ang gisuot nga sinina, taas ang buhok ug taas sab ang heels sa iyang sandal.
Una ang pagpamomba, gikomperma ni Isulan Chief of Police, Lieutenant Colonel Joven Bagaygay nga daghanang negosyante sa lungsod ang nakadawat og extortion letter diin nanghulga pa ang mga suspetsado nga sila mamomba kun mapakyas kini nga muhatag sa protection money.
Gipamahayag sab ni Isulan Mayor Marites Pallasigue nga dunay mga armadong pundok ang nangayo og extortion money sa lokal nga kagamhanan.
Sa imbestigasyon sa mga otoridad, ang IED nga ginamit sa pagpamomba susama sa mga narekober ug mibusikad niadtong milabay nga tuig nga hinimuan sa grupo ni Shiek Esmail Abdulmalik alyas Kumander Abu Toraife sa Bangsamoro Islamic Freedom Fighters (BIFF)-Isis inspired.
Gikondena sab sa militar ug kapulisan ang pagpamomba sa Isulan ug nanawagan sila sa katawhan nga igmaton ang ilang kaugalingon.
“We criticize and condemn the latest IED attack in Isulan that victimized not only our forces who dutifully perform their mandated task but also the civilians who were in the vicinity of the explosion,” matud ni Colonel Efren Baluyot, commander sa 1st Mechanized Infantry (Maaasahan) Brigade.
Dismayado sab si Western Mindanao Command Chief Lieutenant General Cirilito Sobejana sa subling pagpamomba sa Isulan bisan pa man sa pagpaningkamot sa gobyerno alang sa hapsay ug malinawon nga komunidad.
“I enjoin everyone to offer their prayers for the speedy recovery of the victims and for the enlightenment of the perpetrators who aim to undermine the stability of Sultan Kudarat,” pagklaro ni Sobejana.
Sa kasamtangan, gipalig-on pa sa mga awtoridad ang seguridad sa Isulan samtang nagpadayon ang ilang imbestigasyon sa pagpamomba.