SECTIONS
Thursday, September 19, 2019
SUPERBALITA CEBU

Sugilanon: Sulat nga gilabay sa linaw

CARMELO D. LARIOSA

Panadtaran, San Fernando, Cebu

INGON ning orasa, modalikyat si Jun sa tampi sa linaw. Kining linaw maoy ilang suroyanan dinhi sa ilang balangay. Nindot ang talan-awon kay gilibutan kini sa mga dagkong kahoy. Alang kang Jun wala man siyay namatikdan nga butang nga makahatag og kaikag sa iyang panan-aw. Hinuon, kon moabot ang kagabhion nindot tan-awon ang dan-ag sa buwan nga maaninag sa daw salamin nga linaw.

Ning pag-anhi niya karon sa linaw dala niya ang usa ka libro nga kanunay niyang basahon kanang wa siyay trabaho. Apan karon kay gabii na man, igo na lang niyang gibitbit ug gitupad niya sa iyang kilid samtang naglingkod siya sa sementadong lingkuranang gipahimo sa kapitan sa ilang barangay aron may kalingkuran ang mosuroy sa linaw. ‘A FAREWELL TO ARMS’ ang ulohan sa libro, nobela ni Ernest Hemingway, usa ka ‘Nobel prize winner for literature.’ Hinatag kini isip birthday gift kaniya sa ika-30 nga sumad sa adlaw niyang natawhan. Hinatag kini sa iyang higalang dalaga, ni Catherine, nga nahibawo sa iyang hilig. Niadtong higayuna diha pa siya sa serbisyo sa pagka pulis. Karon di na siya pulis. Miluwat siya sa katungdanan dihang ang binuhat nga iyang gimahal nagpadala kaniyag sulat sa pakigbuwag. Si Mirasol nga iyang hinigugma nakigbuwag niya kay mibalik kini sa daan niyang trato. Gisakitan siya pag-ayo niini kay tinuod man niyang gihigugma si Mirasol nga maoy iyang dad-on sa altar sa kaminyuon. Apan isog siyang miangkon sa kapakyasan. Isog siya ug may mga dautang tawo o sagbot sa katilingban nga iyang napatay sa lehitimong operasyon sa kapulisan batok sa ginadiling drugas.

Karon nakaamgo siya nga mas hait ang suwab sa kapakyas kay kini man ang hinungdan nga miluwat siya pagka pulis. Ug nahinumdom siya sa nawong sa ilang hepe nga nasubo kaayo sa iyang hukom. Ug matod pod sa iyang Mama ug Papa, nalipay sila nga dili na siya sakop sa kapulisan sa siyudad, kay nila pa, kanunay silang bation og kakulba ug kabalaka sa matang sa iyang trabaho.

Nahinumdom siya kang Katrina nga nag-estoryahay sila usa ka higayon niana.

“O, di ba, unsay akong gisulti nimo, Jun? Di ba gisugot ka lang ni Mirasol kay nagbuwag man sila si Philip. Ug karon kay nagbalikay na sila, itsa puyra ka na! Gusto man gyud namo nga imong barkada, Jun, nga si Catherine gyud ang imong mauyab. Pero didto man gyud ka kang Mirasol nga duna nay uyab nga basketball player,” matod ni Katrina. Miigham kini unya mipadayon, “Uy, Jun, duna diay koy ibalita nimo, Mouli baya si Catherine sunod semana. Basin magkita mo.” Si Katrina usa sa mga suod niyang higala niadtong hayiskol pa sila. Higala pod kini ni Catherine.

“Mao ba?” Dihay pahiyom nga nagpahipi sa mga ngabil ni Jun.

“O, uy! Busa ayawg guol-guol, kay kon akoy pabotohon nilang duha, ari gyud ko ni Cathy! Gawas nga guwapa, nagtrabaho pa gyud sa Amerika isip nars!” ni Katrina. “Sige, biyaan sa’ tika.” Nananghid si Katrina kay motrabaho pa.

Ginindutan sa katahom sa mga talan-awon dinhi sa linaw ning orasa sa kahapunon, nia na pod si Jun naglingkod sa sementadong lingkuranan. Dala gihapon niya ang libro nga A Farewell to Arms ni Ernest Hemingway. Taudtaod may nabati siyang kasikas sa mga layang dahon sa iyang luyo. Iyang gilingi ug milumpat-lumpat ang iyang kasingkasing pagkakita niya kang Catherine. Nagpahiyom kini nga nagbarog, daw usa ka diyosa sa katahuman. Naamang si Jun ug migilaw ang iyang mga mata. Way migawas nga mga pulong sa iyang baba.

“Jun, kumusta ka? Si Katrina misulti nako nga nia ka dinhi sa linaw,” ni Catherine sa lumo nga tingog. Alang kang Jun morag tam-is nga awit ang mga pulong sa dalaga nga mitupad paglingkod kaniya ug miingon, “Mi-resign ka man kuno pagka pulis!”

“Oo,” tubag ni Jun. Iyang gipunit ang libro ni Hemingway nga diha sa iyang kilid. Nakita kini ni Catherine.

“Wa gyud diay nimo ibuwag ang gihatatag kong libro kanimo, Jun, no?” ni Catherine.

Mitutok si Jun kang Catherine ug miyango. Unya may gikuot siya sa iyang bulsa. Ang sulat ni Marisol kaniya niadtong adlaw nga gibuwagan siya niini. Hinurot ang kusog iya kining gikumot ug gilabay sa tubig sa linaw. Ang kinumot nga papel gidala sa sulog paingon sa halayo hangtod kini nahanaw. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph